ދިވެހި ދުވަހު އައިޕީއެސްގެ އެންމެ ގިނަ ދަރިވަރުން އެއް ހަރަކާތެއްގައި

މިހާތަނަށް އިރުމަތި އަވަށު ޕްރީ ސްކޫލުގެ އެންމެ ގިނަ ދަރިވަރުން އެއް ހަރަކާތެއްގައި ބައިވެރިވި ދިވެހި ދުވަސް ވަރަށް ކުލަ ގަދަ ގޮތެއްގައިި އިއްޔެ ފާހަގަ ކޮށްފި އެވެ.

އައިޕީއެސް ހިންގުމާ ހަވާލުވެ ހުންނެވި ޝަމީމާ ހުސައިން ވިދާޅުވީ ދިވެހި ދުވަސް ފާހަގަ ކުރުމަށް އަފީފުއްދީން ސްކޫލު ހޯލުގައި ބޭއްވި އިވެންޓަށް ވަރަށް ބޮޑު ތަރުހީބެއް ލިބިފައިވާ ކަމަށާއި އެގޮތުން ސްކޫލުގެ 268 ދަރިވަރުން އެ ހަރަކާތްތަކުގައި ބައިވެރިވި ކަމަށެވެ.

އިއްޔެ 4:00 ން 5:30 ށް ބޭއްވި ސްޓޭޖް ހަރަކާތްތަކުގައި އެ ސްކޫލުގައި ތައުލީމު ހާސިލް ކުރަމުންދާ ހުރިހާ އުމުރު ފުރާއެއްގެ ދަރިވަރުންވެސް ބައިވެރިވި އެވެ. ބޭބީ ނާސަރީ ކުދިންގެ ސަގާފީ ނެށުންތަކާއި ނާސަރީ ދަރިވަރުންގެ ފިރިހެން ކުދިންގެ ބޮޑުބެރު ހަރަކާތްތަކުގެ އިތުރުން ދިވެހި ވަޒަން ބަހުރުވައިގެ ބައިތަށް ދަރިވަރުން ހުށަހަޅާދީފައިވެ އެވެ. އެގޮތުން ބަންޖާއި ރައިވަރު އަދި ޅެން ފަދަ ތަކެތި ކުދިން ވަރަށް ފުރިހަމަ ކަމާއެކު ހުށަހަޅާދީފައިވެ އެވެ.

އައިޕީއެސްގެ ކުދިންގެ އިތުރުން މުވައްޒަފުންވެސް ވަނީ ދިވެހި ދުވަހުގެ ހަރަކާތްތަކުގައި ބައިވެރިވެ ތަމްސީލެއް ހުށަހަޅާދީފަ އެވެ.