ހަކުރު ބައްޔަށް ހޭލުންތެރިކުރުމުގެ އެއް ދުވަހުގެ ޕްރޮގްރާމެއް ކުޅުދުއްފުށީގައި ބާއްވަނީ

ޑައިބެޓީސް ސޮސައިޓީ އޮފް މޯލްޑިވްސް އާއި ކުޅުދުއްފުށީ ރީޖަނަލް ހޮސްޕިޓަލް ގުޅިގެން، ހަކުރު ބައްޔަށް ސްކްރީން ކުރުމުގެ ހާއްސަ ޕްރޮގްރާމެއް ކުޅުދުއްފުށީގައި ބޭއްވުމަށް ހަމަޖެހިފައިވާ ކަމަށް ކުޅުދުއްފުށީ ހޮސްޕިޓަލުން ބުނެފި އެވެ.

އަންނަ ހޮނިހިރު ދުވަހު ބާއްވާ މި ހަރަކާތާ ގުޅޭގޮތުން މި ނޫހަށް މައުލޫމާތު ދެއްވަމުން ކުޅުދުއްފުށި ހޮސްޕިޓަލްގެ އެސިސްޓެންޓް ކޮމިއުނިޓީ ހެލްތު އޮފިސަރ ޝަބާނާ އަލީ ވިދާޅުވީ ހަކުރު ބައްޔަށް ސްކްރީން ކުރުމުގެ ޕްރޮގްރާމް ކުރިއަށް ދާނީ ހޮނިހިރު ދުވަހުގެ ހެނދުނު 9 އިން 12 އަށް އަދި މެންދުރު 1:30 އިން ހަވީރު ތިނަކަށް ކުޅުދުއްފުށީ އަފީފުއްދީން ސްކޫލު ހޯލުގައި ކަމަށެވެ.

މި ޕްރޮގްރާމުގައި ހަކުރު ބަލި ޖެހުމުގެ ފުރުސަތު ބޮޑު މިންވަރު ބަލައި ދިނުމާއި ބައްޔާއި ބެހޭގޮތުން ޑޮކްޓަރުންނާއި ނަރުހުންނާ މަޝްވަރާކުރުމަށް ފުރުޞަތު ދިނުމާއި އިސްކޮޅާއި ބަރުދަން ބަލައި ދިނުމާއި، އިސްކޮޅާ އަޅާބަލާއިރު ބަރުދަން ހުންނަންވީ މިންގަނޑު އަންގައިދިނުމާއި ހަކުރު ބަލި ހުންނަ މީހުންނަށް ހަކުރު ބަލީގެ ސަބަބުން އިތުރަށް ދިމާވާ މައްސަލަތައް ހުރިތޯ ބެލުމަށް ސްކްރީން ކޮށްދިނުން ހިމެނޭނެ ކަމަށެވެ.

އަދި އެ ވަގުތުތަކުގައި ހަކުރު ބައްޔާ ބެހޭގޮތުން މައުލޫމާތު ދިނުމާއި ހަކުރު ބައްޔަށް ޓެސްޓްކޮށް ދިނުމާއި ލޭގެ ޕްރެޝަރ ބަލާ ދިނުމާއި ހަށިގަނޑުގައި ސަރުބީ ހުރި މިންވަރު ބަލާ ދިނުމުގެ އިތުރުން އުނަގަނޑުގެ ވަށަމިން ހުންނަ މިންވަރު ބަލާދެވޭނެ ކަމަށް ޝަބާނާ ވިދާޅުވި އެވެ.

 ޝަބާނާ ވިދާޅުވީ މިފަދަ ޕްރޮގްރާމެއް ކުރިއަށް ގެންދަނީ ހަކުރު ބައްޔާ ބެހޭގޮތުން އާންމުންގެ މެދުގައި ހޭލުންތެރިކަން އިތުރުކުރުމާއި މައުލޫމާތު ފޯރުކޮށްދިނުމުގެ މަގުޞަދުގައި ކަމަށެވެ. އަދި އާންމުންގެ ތެރެއިން ބަލި ޖެހުމުގެ ނުރައްކާ ބޮޑީ ކޮންބަޔެއްތޯ ބަލައި މައުލޫމާތު އެއްކުރުމާއި ހަކުރު ބަލީގެ މީހުންނަށް ބައްޔާއި އެކު އާދައިގެ ދިރިއުޅުމެއް އުޅުމަށް އެހީތެރިވެދިނުމަކީ މިފަދަ ޕްރޮގްރާމެއް ހިންގުމުގެ އެންމެ މުހިއްމު އެއް ބޭނުން ކަމަށް އޭނާ ވިދާޅުވި އެވެ.

 މި ޕްރޮގްރާމުގައި 16 އަހަރުން މަތީގެ ކޮންމެ މީހަކަށްވެސް ބައިވެރިވެވޭ އިރު އައިޑީ ކާޑު ހިފައިގެން ދިއުމަށް ކުޅުދުއްފުށީ ހޮސްޕިޓަލުން އެދިލައްވައެވެ.