ފޭސްބުކަށް އަންހެން ކުދިންގެ ބަރަހަނާ ފޮޓޯ ލަމުންދިޔަ މީހަކު ހޯދަން ފަށައިފި

ފޭސްބުކަށް އެކި އެކި އަންހެން ކުދިންގެ ބަރަހަނާ ފޮޓޯތައް ލައި، ފޭސްބުކް ސްޓޭޓަސް ތަކުގައި ހުތުރު ބަސްމަގު ބޭނުންކޮށް ބައެއް އިދާރާތައް ބަދުނާމުކުރަމުން ދިޔަ މީހަކު ހައްޔަރުކުރުމަށް ފުލުހުން ހޯދަން ފަށައިފި އެވެ.

ފުލުހުން ބުނީ މި މައްސަލައިގައި ކޯޓު އަމުރެއްގެ ދަށުން ހޯދަމުން ދަނީ ކުޅުދުއްފުށި އެޕަލް، މުޙައްމަދު އިބްރާހީމް (25އ) އެވެ.

“މުޙައްމަދު އިބްރާހީމް ހޯދުމަށް އިޢުލާން ކޮށްފައި މިވަނީ މުޙައްމަދު އިބްރާހީމް ބޭނުންކުރަމުންދާ ކަމަށް ތުޙުމަތުކުރެވޭ ފޭސްބްކް އައި.ޑީ އަކުން 2014 މެއި 18 ވަނަ ދުވަހުން ފެށިގެން އެކި އަންހެން ކުދިންގެ ބަރަހަނާ ފޮޓޯތައް ލައި ހަޑި ހުތުރު ބަސްމަގުން ސްޓޭޓަސް އަޕްލޯޑް ކޮށް، ބައެއް އިދާރާތައް ބަދުނާމުކުރަމުން ދިޔަ މައްސަލާގައި އޭނާގެ ބަޔާން ނެގުމަށް އޭނާ ހޯދުމަށް ކުރި މަސައްކަތުން އޭނާ ދިރިއުޅޭ ވަކި އެޑްރެހެއް ނޭގުމުގެ ސަބަބުންނެވެ.” ފުލުހުންގެ މީޑިޔާއިން ނެރުނު ހަބަރުގައި ބުނެފައި ވެއެވެ.

ފުލުހުން ބުނީ މި މައްސަލައާ ގުޅިގެން ހޯދަމުން އަންނަ މުހައްމަދު އިބްރާހީމް ކުޅުދުއްފުށީގައި ނޫޅޭ ކަމަށެވެ. އަދި އޭނާގެ ފޯނަށް ގުޅައި އޭނާ ހުރިތަނެއް ދެނެގަތުމަށް ކުރި މަސައްކަތުންވެސް އޭނާ ހުރިތަނެއް ނުބުނެ މައްސަލައިގެ ތަހުގީގަށް އެއްބާރުލުން ދިނުމަށް ދެކޮޅު ހަދާފައިވާ ކަމަށެވެ.

މުހައްމަދު އިބްރާހީމް ހައްޔަރުކުރުމުގެ އަމުރު ފުލުހުންގެ މައްޗަށް ކޮށްފައިވަނީ ކުޅުދުއްފުށީ މެޖިސްޓްރޭޓް ކޯޓުންނެވެ.

މުޙައްމަދު އިބްރާހީމާއި ބެހޭ އެއްވެސް މައުލޫމާތެއް ލިބިފައިވާނަމަ އެ މައުލޫމާތެއް ޕޮލިސްގެ ހޮޓްލައިން ނަމްބަރު 3322111 އަށް ނުވަތަ ކުޅުދުއްފުށީ ޕޮލިސް ސްޓޭޝަންގެ ނަމްބަރު 9791382 ނުވަތަ 6528851 އަށް ގުޅުއްވައި އެ މައުލޫމާތު ހިއްސާކޮށްދެއްވުމަށް ފުލުހުން އެދިލައްވައެވެ.

މި މައްސަލަ ކުޅުދުއްފުށީ ޕޮލިސް ސްޓޭޝަނުން ތަހުގީގު ކުރަމުން އަންނައިރު ސޯޝަލް މީޑިޔާގައި “ވަގު އައިޑީ” ބޭނުންކޮށްގެން ހިންގާ ޖިނާއީ މައްސަލަތައް އަންނަނީ އިތުރުވަމުންނެވެ.