ފޭސްބުކަށް އަންހެން ކުދިންގެ ބަރަހަނާ ފޮޓޯ އަޕްލޯޑްކުރި މައްސަލައިގައި ހޯދި މީހާ ފުލުހުންނާ ހަވާލުވެއްޖެ

ފޭސްބުކަށް އެކި އެކި އަންހެން ކުދިންގެ ބަރަހަނާ ފޮޓޯތައް ލައި، ފޭސްބުކް ސްޓޭޓަސް ތަކުގައި ހުތުރު ބަސްމަގު ބޭނުންކޮށް ބައެއް އިދާރާތައް ބަދުނާމުކުރަމުން ދިޔަ މައްސަލައިގައި ހޯދަމުންދިޔަ މީހާ ފުލުހުންނާ އަމިއްލައަށް ހަވާލުވެއްޖެ އެވެ.

ފުލުހުން ބުނީ މި މައްސަލައިގައި ކޯޓު އަމުރެއްގެ ދަށުން ހޯދަމުން ދަނީ ކުޅުދުއްފުށި އެޕަލް، މުޙައްމަދު އިބްރާހީމް (25އ) މިއަދު އޭނާ ފުލުހުންގެ އިދާރާއަށް އަމިއްލައަށް ހާޒިރުވެއްޖެ ކަމަށެވެ.

ފުލުހުން އޭނާ ހޯދުމަށް އިއުލާނު ކޮށްފައި ވަނީ އޭނާ ބޭނުންކުރަމުންދާ ކަމަށް ތުޙުމަތުކުރެވޭ ފޭސްބްކް އައި.ޑީ އަކުން 2014 މެއި 18 ވަނަ ދުވަހުން ފެށިގެން އެކި އަންހެން ކުދިންގެ ބަރަހަނާ ފޮޓޯތައް ލައި ހަޑި ހުތުރު ބަސްމަގުން ސްޓޭޓަސް އަޕްލޯޑް ކޮށް، ބައެއް އިދާރާތައް ބަދުނާމުކުރަމުން ދިޔަ މައްސަލާގައި އޭނާގެ ބަޔާން ނެގުމަށް އޭނާ ހޯދުމަށް ކުރި މަސައްކަތުން އޭނާ ދިރިއުޅޭ ވަކި އެޑްރެހެއް ނޭގުމުގެ ސަބަބުން ކަމަށެވެ.

މުހައްމަދު އިބްރާހީމް ހައްޔަރުކުރުމުގެ އަމުރު ފުލުހުންގެ މައްޗަށް ކޮށްފައިވަނީ ކުޅުދުއްފުށީ މެޖިސްޓްރޭޓް ކޯޓުންނެވެ.

މި މައްސަލަ ކުޅުދުއްފުށީ ޕޮލިސް ސްޓޭޝަނުން ތަހުގީގު ކުރަމުން އަންނައިރު ސޯޝަލް މީޑިޔާގައި “ވަގު އައިޑީ” ބޭނުންކޮށްގެން ހިންގާ ޖިނާއީ މައްސަލަތައް އަންނަނީ އިތުރުވަމުންނެވެ.