ކުޅުދުއްފުށި އޮންލައިންގެ 4 ވަނަ ކުރުވާހަކަ މުބާރާތް ބަދަލުތަކަކާއެކު އަންނަ ހޮނިހިރު ދުވަހު!

Jun 15, 2014

ކުޅުދުއްފުށީ އޮންލައިން އާއި ޖަލާލުއްދީން ސްކޫލުގެ ދިވެހި ޑިޕާޓްމަންޓް ގުޅިގެން ބާއްވަމުން އައި ކުރުވާހަކަ ލިޔުމުގެ މުބާރާތަށް ބައެއް ބަދަލުތައް ގެނެސް އަންނަ ހޮނިހިރު މި އަހަރުގެ މުބާރާތް ބާއްވާ ގޮތަށް ހަމަޖައްސައިފި އެވެ.

ކުރީ އަހަރުތަކާ ހިލާފަށް މި އަހަރުގެ މުބާރާތުގައި ޖަލާލުއްދީން ސްކޫލުގެ އިތުރުން ކުޅުދުއްފުށީ އަފީފުއްދީން ސްކޫލުގެ ގްރޭޑް 10 ގެ ދަރިވަރުންވެސް ބައިވެރިކުރާ ގޮތަށް ވަނީ ހަމަޖެހިފައެވެ.

“ކުޅުދުއްފުށި އޮންލައިން” ގެ އޮފިޝަލަކު ވިދާޅުވީ މި އަހަރުގެ މުބާރާތުގައި އަފީފުއްދީން ސްކޫލު ބައިވެރިކުރަން ނިންމީ، އެއް ގްރޭޑަކަށް ކިޔަވައިދޭ ދެ ސްކޫލު ހުންނައިރު، އަފީފުއްދީން ސްކޫލުގެ 10 ގެ ދަރިވަރުންނަށް ވެސް އެ ފުރުސަތު ހޯދައިދިނުމުގެ ގޮތުން ކަމަށެވެ.

ފާއިތުވި 3 އަހަރުވެސް ބޭއްވި މި މުބާރާތަކީ ކުޅުދުއްފުށީގައި ބާއްވާ އަދަބީ މުބާރާތެއްގައި އެންމެ އަގު ބޮޑު އިނާމު ލިބޭ އެއް މުބާރާތެވެ.

ޖަލާލުއްދީން ސްކޫލުގެ ދަރިވަރުންނަށް އަމާޒުކޮށްގެން މީގެ ދެ އަހަރު ކުރިން ފެށިގެން ބާއްވަމުން އަންނަ މި މުބާރާތަކީ ދިވެހި ބަސް ކުރިއަރުވާ، ވާހަކަ ލިޔުމުގެ ފަންނު ދަރިވަރުންގެ ކިބައިގައި އަށަގެންނެވުމުގެ ގޮތުން ބާއްވާ މުބާރާތެއް ކަމަށް ކުޅުދުއްފުށި އޮންލައިންގެ މެނޭޖްމަންޓުން ބުނެއެވެ.

ޖަލާލުއްދީން ސްކޫލުގެ ގްރޭޑް 10، 11 އަދި 12 ގެ ދަރިވަރުންނަށް އަދި އަފީފުއްދީން ސްކޫލުގެ ގްރޭޑް 10 ގެ ދަރިވަރުންނަށް އަމާޒުކޮށްގެން ކުރިއަށް ގެންދާ މި މުބާރާތުން ހޮވާލެވޭ އެންމެ މޮޅު 15 ވާހަކަ “ކުޅުދުއްފުށި އޮންލައިން” ގައި ޝާއިއު ކުރާނެއެވެ.

ކުޅުދުއްފުށި އޮންލައިނުން މިދިޔަ އަހަރު ބޭއްވި ކުރުވާހަކަ ލިޔުމުގެ މުބާރާތުގެ އެއްވަނަ ލިބިފައިވަނީ އަހުމަދު އިބްރާހިމް ލިޔުނު “ކަސްބީ” ވާހަކައަށެވެ. މިދިޔަ އަހަރުގެ މުބާރާތުގެ އެއްވަނަ އަށް ދިޔަ ފަރާތަށް އެންޑްރޮއިޑް ޓެބްލެޓެއްގެ އިތުރުން ޓްރޮފީއަކާއި ހަނދާނީ ލިޔުމެއް ވަނީ ދީފައެވެ.

މިލިޔުމާއި ގުޅޭ