ހދ އަތޮޅުން 1800 އަށްވުރެ ގިނަ މީހުން ހަކުރު ބައްޔަށް ސްކްރީން ކޮށްފި

ހަކުރު ބައްޔަށް ސްކްރީން ކުރުމުގެ ގޮތުން ހދ އަތޮޅުގައި ކުރިއަށް ގެންދިޔަ ޕްރޮގްރާމުގައި 13 ރަށަކުން 1802 މީހަކު ހަކުރު ބައްޔަށް ސްކްރީން ކޮށްފައިވާ ކަމަށް ޑައަބެޓީސް ސޮސައިޓީ އޮފް މޯލްޑިވްސް އިން ބުނެފި އެވެ.

މި މަހުގެ ހަތަކުން ސާދައަށް ކުރިއަށް ގެންދިޔަ މި ޕްރޮގްރާމާ ބެހޭގޮތުން ޑައިބެޓީސް ސޮސައިޓީ އޮފް މޯލްޑިވްސްގެ މެޑިކަލް ޑައިރެކްޓަރ ނާއިލާ އަބުދުލް މަޖީދު ވިދާޅުވީ މުޅި ރާއްޖޭގައި ކުރިއަށް ގެންދާ މި ޕްރޮގްރާމުގައި މިހާތަނަށް އެންމެ ގިނަ އަދަދެއްގެ މީހުން ސްކްރީން ކުރެވިފައިވަނީ ހދ އަތޮޅުން ކަމަށެވެ.

އޭނާ ވިދާޅުވީ މިޕްރޮގުރާމްގެ މަގުސަދަކީ ހަކުރު ބައްޔަށް ރައްޔިތުން ހޭލުންތެރިކޮށް މިފަދަ ބަލިތައް ޖެހުމުގެ ފުރުސަތު ބޮޑު މީހުންނަން އެކަން އަންގައިދީ އެ ބަލިތައް ޖެހުމުގެ ކުރިން ރައްކާތެރިކަމުގެ ފިޔަވަޅު އެޅުމަށް ކުރެވިދާނެކަން ތައްތައް ބުނެދިނުން ކަމަށެވެ.

މި ޕްރޮގްރާމުގައި ހަކުރު ބަލި ޖެހުމުގެ ފުރުސަތު ބޮޑު މިންވަރު ބަލައި ދިނުމާއި ބައްޔާ ބެހޭގޮތުން ޑޮކްޓަރުންނާއި ނަރުހުންނާ މަޝްވަރާކުރުމަށް ފުރުސަތު ދިނުމާއި އިސްކޮޅާއި ބަރުދަން ބަލައި ދިނުމާއި، އިސްކޮޅާ އަޅާބަލާއިރު ބަރުދަން ހުންނަންވީ މިންގަނޑު އަންގައިދިނުމާއި ހަކުރު ބަލި ހުންނަ މީހުންނަށް ހަކުރު ބަލީގެ ސަބަބުން އިތުރަށް ދިމާވާ މައްސަލަތައް ހުރިތޯ ބެލުމަށް ސްކްރީން ކޮށްދިނުން ހިމެނެ އެވެ.

އަދި ހަކުރު ބައްޔާ ބެހޭގޮތުން މައުލޫމާތު ދިނުމާއި ހަކުރު ބައްޔަށް ޓެސްޓްކޮށް ދިނުމާއި ލޭގެ ޕްރެޝަރ ބަލާ ދިނުމާއި ހަށިގަނޑުގައި ސަރުބީ ހުރި މިންވަރު ބަލާ ދިނުމުގެ އިތުރުން އުނަގަނޑުގެ ވަށަމިން ހުންނަ މިންވަރު ބަލައިދީފައިވެ އެވެ.