ބީ.އެމް.އެލް އިން ހުރިހާ ކަސްޓަމަރުންނަށް އަލުން ވިސާ ޑެބިޓް ކާޑު ދޫކުރަން ފަށަނީ

ބޭންކް އޮފް މޯލްޑިވްސް އިން އާއްމުކޮށް ވިސާ ޑެބިޓް ކާޑު ދޫކުރުން ހުއްޓާލާފައި އޮތުމަށްފަހު އަލުން ދޫކުރަން ފަށަން ނިންމައިފި އެވެ.

2010 ވަނަ އަހަރުގެ ނޮވެމްބަރު މަހުން ފެށިގެން މިހާތަނާ ޖެހެންދެންވެސް ބީއެމްއެލްއިން ވިސާ ޑެބިޓް ކާޑު ދޫކުރަމުން އައީ ހަމައެކަނީ ޔޫއެސް ޑޮލަރު އެކައުންޓްތަކަށެވެ. ނަމަވެސް ކުރިންވެސް ރުފިޔާ އެކައުންޓުތަކަށް ދޫކޮށްފައިވާ ކާޑުތައް ބޭންކުން އައީ އައުކޮށްދެމުންނެވެ. މިބަދަލާއެކު ރުފިޔާ އެކައުންޓްތަކަށް ލިންކް ކުރައްވައިގެން މީގެ ފަހުން ވިސާ ޑެބިޓް ކާޑު ލިބިގެންދާނެ ކަމަށް ބޭންކުން މައުލޫމާތު ދެއެވެ.

އަންނަ ޖުލައި މަހުގެ 6 ވަނަ ދުވަހުން ފެށިގެން ހުރިހާ ކަސްޓަމަރުންނަށް އާންމުކޮށް ވިސާ ޑެބިޓް ކާޑު ދޫކުރަންފަށާއިރު، ރާއްޖެއިން ބޭރުގައި މަތީ ތަޢުލީމު ހާސިލުކުރަމުންދާ ދަރިވަރުންނަށް ޚާއްސަ އަހައްމިއްޔަތެއް ދިނުމަށް ބޭންކުންވަނީ ނިންމާފައެވެ. މިގޮތުން މިއަދުން ފެށިގެން ޖުލައި 6 އާ ހަމައަށް ވިސާ ޑެބިޓް ކާޑު ދޫކުރުމަށް ހަމަޖެހިފައިވަނީ ހަމައެކަނި ރާއްޖެއިން ބޭރުގައި ކިޔަވަމުންދާ ދަރިވަރުންނަށާއި ރާއްޖެއިން ބޭރަށް ކިޔަވަން ދިޔުމަށް ޕްލޭސްމަންޓް ހޯދާފައިވާ ފަރާތްތަކަށެވެ.

ވިސާ ޑެބިޓް ކާޑު އަލުން ދޫކުރަން ފެށުމާ ގުޅިގެން ބޭންކުގެ ސީ.އީ.އޯ އަދި މެނޭޖިންގ ޑައިރެކްޓަރ މރ. އެންޑްރޫ ހީލީ ވިދާޅުވީ ހުރިހާ ކަސްޓަމަރުންނަށް ވިސާ ޑެބިޓް ކާޑު ދޫކުރަން ނިންމީ ހުރިހާ އެންމެންނަށް ބޭންކިންގ ޚިދުމަތް ފޯރުކޮށްދިނުމަށް ބޭންކުން ކަނޑައަޅާފައިވާ ސްޓެރެޓެޖީގެ ދަށުންކަމުގައެވެ. މިއީ ހުރިހާ ކަސްޓަމަރުންނަށް، ވަކިން ޚާއްސަކޮށް ރާއްޖެއިން ބޭރުގައި މަތީ ތަޢުލީމު ހާސިލުކުރާ ދަރިވަރުންނަށް ވަރަށް އުފާވެރި ޚަބަރަކަށް ވާނެކަމަށް ގަބޫލުކުރައްވާކަމަށްވެސް ހީލީ ވިދާޅުވިއެވެ.

ވިސާ ޑެބިޓް ކާޑު ބޭނުންކޮށްގެން ބީއެމްއެލްގެ އޭޓީއެމްތަކުން ދުވާލަކު 10,000 ރުފިޔާ ނެގޭއިރު، ބޭރުގެ އޭޓީއެމްތަކުން ދުއިސައްތަ ޑޮލަރަށްވާ ފައިސާ ނެގެއެވެ. އަދި ރާއްޖެއިން ބޭރުގައި ޕީއޯއެސް މެދުވެރިކޮށް ދުވާލަކު 400 ޑޮލަރުގެ ޓްރާންސެކްޝަން ހެދެއެވެ.

ކަސްޓަމަރުންނަށް ދޭ ޚިދުމަތުގެ ފެންވަރު ރަނގަޅުކުރުމުގެ ގޮތުން ކާޑު ސެންޓަރުގެ އިތުރުން މެއިން ބްރާންޗުންނާއި މަޖީދީމަގު ބްރާންޗުންވެސް ކާޑާއި ޕިން އަދި އިންޓަރނެޓް ބޭންކިންގ ޕާސްވޯޑާއި ޓޯކަން ދޫކުރަން ދާދިފަހުން ބޭންކުންވަނީ ފަށާފައެވެ.