ނާޖާއިޒު ފައިދާ ހޯދައިދިނުމުގެ ކުށުގައި ފޭދޫ ކަތީބުގެ މައްޗަށް ދައުވާކުރުމަށް ޕީޖީއަށް

މަގާމުގެ ބޭނުންކޮށްގެން ނާޖާއިޒް ފައިދާ ހޯދައިދިނުމުގެ ކުށުގައި ށ. ފޭދޫގެ ކުރީގެ ކަތީބު މުހައްމަދު ޝުކުރީގެ މައްޗަށް ދައުވާ ކުރުމަށް ޕްރޮސެކިއުޓަރ ޖެނަރަލްގެ އޮފީހަށް ފޮނުވައިފި އެވެ.

މި މައްސަލަ އެންޓި ކޮރަޕްޝަން ކޮމިޝަނުން ތަހުގީގު ކޮށްފައިވަނީ ށ. ފޭދޫގެ އިންޖީނުގެއަށް ސްޕީޑް ކޮންޓްރޯލް ޔުނިޓެއް ބާޒާރުން ލިބެންހުރި އަގު ކަމުގައިވާ 13000 ރުފިޔާގެ ބަދަލުގައި އެ އިންޖީނު 23500 ރުފިޔާއަށް އަމިއްލަ ފަރާތެއްގެ އަތުން ގަނެފައިވާތީ ހުށައަޅާފައިވާ މައްސަލައަކާ ގުޅިގެންނެވެ.

އޭރު އިންޖީނުގެއާ ވެސް ހަވާލުވެ ހުންނެވި ޝުކޫރު، ށ. ފޭދޫ އޮފީހުން ހޯދައިފައިވާ ދެ ކޯޓޭޝަނުގެ އަގަށް ވުރެންވެސް ބޮޑު އަގެއް ކަމުގައިވާ 23500 ރުފިޔާއަށް އެ އިންޖީނު ގަނެފައިވާކަން އޭސީސީއިން ކުރި ތަހުގީގުން ވަނީ އެނގިފައެވެ.

މިކުށް އޭނާގެ މައްޗަށް ސާބިތުވެއްޖެނަމަ 3 އަހަރު ދުވަހުގެ އަދަބެއް އޭނާގެ މައްޗަށް އަންނާނެ އެވެ.