މުޒާހަރާއާ ގުޅިގެން ކުޅުދުއްފުށީ ރީޖަނަލް ހޮސްޕިޓަލުގެ ޑޮކްޓަރުން ޑިއުޓީއަށް ނިކުތުމަށް ފަސްޖެހިއްޖެ

ކުޅުދުއްފުށީ ރީޖަނަލް ހޮސްޕިޓަލުގެ ހިދުމަތްތައް ދަށްވެފައިވާތީ، އެކަން ސަރުކާރުގެ ސަމާލުކަމަށް ގެނައުމުގެ ގޮތުންކަމަށް ބުނެ އިއްޔެ ހޮސްޕިޓާ ކުރިމަތީގައި ކުރި މުޒާހަރާއާ ގުޅިގެން ކުޅުދުއްފުށީ ހޮސްޕިޓަލުގައި މަސައްކަތްކުރާ ޑޮކްޓަރުން ޑިއުޓީއަށް ނުކުތުމަށް ފަސްޖެހިއްޖެ އެވެ.

މިނޫހަށް މައުލޫމާތު ދިން ޑޮކްޓަރެއް ބުނީ އިއްޔެކުރި މުޒާހަރާގައި ބައެއް ބައިވެރިން ސީދާ ޑޮކްޓަރުންގެ ނަމުން ގޮވާ އެމީހުން ބޭރުކުރުމަށް ގޮވާލާފައިވުމުން ޑޮކްޓަރުންގެ ރައްކާތެރިކަމާމެދު ސުވާލު އުފެދިފައިވާ ކަމަށެވެ. އަދި އެކަމުގެ ސަބަބުން ބައެއް ޑޮކްޓަރުން ބިރު ގެންފައިވާ ކަމަށްވެސް އޭނާ މައުލޫމާތުދިނެވެ.

އިއްޔެ ކުޅުދުއްފުށީ ހޮސްޕިޓަލުގެ ކުރިމަތީގައި ކުރި މުޒާހަރާގައި އެތަނުގައި މަސައްކަތްކުރާ ހަމައެކަނި އަންހެނުންގެ ހާއްސަ ޑޮކްޓަރު ބޭރުކުރުމަށް މުޒާހަރާގެ ބައިވެރިވަނީ ގޮވާލާފަ އެވެ. އަދި މީގެ އިތުރުން، އިތުރު ބައެއް ޑޮކްޓަރުންގެ ނަމުން ގޮވާ އަޑުގަދަކޮށްފައިވާ ކަން ފާހަގަކުރެވުނެވެ.

މިއަދު ކުޅުދުއްފުށީ ހޮސްޕިޓަލުގެ މަސައްކަތް ކުރާ ޑޮކްޓަރުން ޑިއުޓީއަށް ނިކުމެފައިވަނީ 10 ޖެހިއިރު އެވެ. މީގެ ސަބަބުން އެވަގުތު ޑޮކްޓަރަށް ދެއްކުމަށް ގޮސްތިބި ބަލިމީހުންނަށް ދަތިތަކާ ދިމާވި އެވެ.