ކުއަންޓަމް އެވޯޑްގައި ސޮއްޕެ ޕާރފޯމް ކުރަނީ

ކުޅުދުއްފުށީ ކުއަންޓަމް ފިހާރައިން އިންތިޒާމްކުރާ 2013 ވަނަ އަހަރުގެ ކުއަންޓަމް އެވޯޑްސްގައި ރެޕް ހިޕް ހޮޕް އާރޓިސްޓް ސޮއްޕެ ޕާރފޯމް ކުރަން ހަމަޖެހިއްޖެ އެވެ.

ވޭތުވެދިޔަ 2013 ވަނަ އަހަރުގައި ބޭއްވުނު ފުޓްބޯޅަ މުބާރާތްތަކަށް އަމާޒު ކޮށް ބޭއްވޭ މިހަފްލާގައި ސޮއްޕެގެ 4 ހުށައެޅުމެއް ފެނިގެންދާނެ އެވެ. އަދި ސޮއްޕެއާ އެކު ސޮއްޕެގެ ބައިވެރިއެއްގެ ގޮތުން މުހައްމަދު ސިފާޒު ހުށައެޅުންތަކުގައި ބައިވެރިވާނެކަމަށް ކުއަންޓަމްއިން މައުލޫމާތު ދިނެވެ.

މިފަދަ ގޮތަކަށް ކުޅުދުއްފުށީގައި ބޭއްވޭ ފުރަތަމަ އެވޯޑް ހަފްލާ ކަމުގައިވާ މި ހަފްލާ ސަރަފުވެރިކޮށްދެއްވާނީ އެފްއޭއެމްގެ ކުރީގެ ޑިރެކްޓަރ އޮފް ނޭޝަނަލް ޓީމްސް އަދި މިހާރުގެ މާޒިޔާ ފުޓުބޯޅަ ކުލަބުގެ ކޯޗު އަލީ ސުޒެއިން އެވެ.

މީގެ އިތުރުން މާދަމާ ރޭ ބާއްވަން ހަމަޖެހިފައިވާ މި ކުލަގަދަ ހަފްލާގައި ޔޫތު މިނިސްޓްރީގެ ކޯޑިނޭޓަރ އަހުމަދު ސިނާން (ނާނީ) ބައިވެރިވެލައްވާނެ އެވެ. ނާނި އަކީ ބާސްކެޓް އަދި ފުޓުބޯޅައިގައި ރަން ވަނަ ތަކެއް ހޯދައިފައިވާ ފަރާތަކަށް ވާއިރު މިސްޓަރ ބައިބަލާ އެތައް ފަހަރަކު ހާސިލުކުރައްވާފައިވާ ކުޅިވަރުގެ ސަހުސިއްޔަތެކެވެ.

މި ހަފްލާގައި ވޭތުވެދިޔަ އަހަރުގެ އެންމެ މޮޅު ކުޅުންތެރިޔާއާއި، އެންމެ ގިނަ ގޯލު ޖެހި ކުޅުންތެރިޔާގެ އިތުރުން ޑްރީމް ޓީމެއް ހޮވާ ގޮތަށް ވަނީ ހަމަޖެހިފަ އެވެ.

މިކަމަށްޓަކާ އެކުލަވާލާފައިވާ ހާއްސަ ޕެނަލަކުން އެންމެ މޮޅު ކުޅުންތެރިޔާގެ މަޤާމަށް ވާދަކުރާ 5 ކުޅުންތެރިންނަށް ކަނޑައަޅާފައިވަނީ ވޭތުވެދިޔަ އަހަރު ހިރަފުސް އަދި ޓީމް ކޮރަލްސް އަށް ކުޅެފައިވާ ފަރުހަތު މުހައްމަދު ބޮޑުރުއްދޮށުގެ އިތުރުން ޓީމް ކޮރަލްސްއަށް ނިސްބަތްވާ 4 ކުޅުންތެރިން ކަމަށްވާ ޒައިދު މުހައްމަދު އާނިރު، އަހްމަދު ނައީމް ޓޯޓަލްގެ، ފަތުހުﷲ އާދަމް ދިވަރު އަދި އަހްމަދު ދާވޫދު ރޯމާ އެވެ.

26 ޖޫން ވާ ބުރާސްފަތި ދުވަހުގެ ރޭގަނޑު 20:30 ގައި ތިލަދެކުނު ސިނަމާގައި ބޭއްވުމަށް ހަމަޖެހިފައިވާ މި ހަފްލާގައި ވީހާވެސް ގިނަ ބޭފުޅުން ބައިވެރިވުމަކީ ކުއަންޓަމް ފިހާރައިގެ ވަރަށް ބޮޑު އެދުމެކެވެ.