ނުވައަކުން ދަށުގެ ގްރޭޑްތަކުގެ ކިޔެވުން ނުބާއްވާ ގޮތަށް އެޑިއުކޭޝަނުން ނިންމައިފި

އެޑިއުކޭޝަން މިނިސްޓްރީގެ ސަރކިއުލަރއާ އެއްގޮތަށް ރޯދަމަހު 9 އަކުން ދަށު ގުރޭޑުތަކުގެ ކިޔެވުން ކުޅުދުއްފުށީ ސްކޫލުތަކުގައި ނުބާއްވާނެ ކަމަށް ސްކޫލުތަކުން ބުނެފި އެވެ.

އޭއީސީ ގައި ރޯދަމަހު ކިޔެވުން ނޯންނައިރު އަފީފުއްދީން ސްކޫލުގައި ގުރޭޑް 10 އެއްގެ އަދި ޖަލާލުއްދީން ސްކޫލުގެ ގުރޭޑް 10 ، 11 އަދި 12 ގެ ކިޔެވުން ހެނދުނު 9 އަކުން 12 އޮންނާނެ ކަމަށް އެސްކޫލުތަކުން މައުލޫމާތުދެ އެވެ.

މިނިސްޓްރީން ނެރެފައިވާ ސަރކިއުލަރގައި ވަނީ ޕްރީ ސްކޫލުން ފެށިގެން ގުރޭޑް 9 އަކާ ހަމައަށް ރޯދަމަހު ކިޔެވުން ނޯއްނާނެ ކަމަށާއި ގުރޭޑް 10 11 އަދި 12 ގެ ގުރޭޑުތަކުގެ ކިޔެވުން ކުރިއަށް ގެންދަންޖެހޭނެކަމަށެވެ.

ސާރކިއުލަރގާ ވާ ގޮތުން ސްކޫލުތަކުގެ ސެޝަންތައް ފަށަންޖެހޭނީ 9 ގެ ފަހުން ކަމަށެވެ. އަދި ކިޔަވައިދޭ ގޮތަށް ހަމަޖައްސާފައި ވަނީ ސެޝަނެއްގައި ތިން ގަޑިއިރެވެ.

މި ސަރކިއުލަރ އައުމުގެ ކުރިން އެއް ދަންފަޅިއަށް ކިޔަވައިދޭ ސްކޫލުތަކުގައި ކިޔަވައިދޭގޮތަށް ހަމަޖެހިފައި އޮތީ 10:30 ން 12:00 ށެވެ. އަދި ދެ ދަންފަޅިއަށް ކިޔަވައިދޭ ސްކޫލުތަކުގައި ކިޔަވައިދޭގޮތަށް ހަމަޖެހިފައި އޮތީ ފުރަތަމަ ދަންފަޅި 9:30 ން 12:00 ށް އަދި ދެވަނަ ދަންފަޅި 1:00 ން 3:30 ށެވެ.