ބީއެމްއެލްއިން ކުޅުދުއްފުށީގައި ގާއިމްކުރި ދެވަނަ އޭޓީއެމްގެ ހިދުމަތް މިއަދު ފަށައިފި

ބޭންކު އޮފް މޯލްޑިވްސްއިން ކުޅުދުއްފުށީގައި ގާއިމްކުރި ދެވަނަ އޭޓީއެމްގެ ހިދުމަތް މިއަދު ފަށައިފި އެވެ.

އޭޓީއެމް ހުޅުވުމަށް މިއަދު ކުޅުދުއްފުށީގައި ބޭއްވި ހާއްސަ ރަސްމިއްޔާތެއްގައި އޭޓީއެމް ހުޅުވައިދެއްވީ ބޭންކު އޮފް މޯލްޑިވްސްގެ ސީއީއޯ އެންޑްރޫ ހީލީ އެވެ. އަދި ހުޅުވާ ދެއްވުމަށް ފަހު އެންޑްރޫ އާއި ކުޅުދުއްފުށީ ކައުންސިލުގެ ރައީސް އަލީ މުހައްމަދު ވަނީ އޭޓީއެމްއިން ހިދުމަތް ބޭނުން ކުރައްވާފަ އެވެ.

އޭޓީއެމް ހުޅުވުމުގެ ރަސްމިއްޔާތުގައި ވާހަކަ ދައްކަވަމުން އެންޑްރޫ ވިދާޅުވީ ކުޅުދުއްފުއްޓަކީ އުތުރުގެ ވިޔަފާރީގެ މައިހަބެއް ކަމަށާއި، މިއަދު ހުޅުވިގެން މިދިޔަ އާ އޭޓީއެމް ހިދުމަތުގެ ސަބަބުން ސަރަހައްދުގެ ގިނަ ރައްޔިތުންތަކަކަށް ލުއި ފަސޭހަގޮތެއްގައި ބޭންކިންގެ ހިދުމަތް ލިބިގެންދާނެ އެވެ.

މިރަސްމިއްޔާތުގެ ހަވާސާގައި “ކުޅުދުއްފުށީ އޮންލައިނާ” ވާހަކަ ދައްކަވަމުން ބޭންކް އޮފް މޯލްޑިވްސްގެ މާކެޓިންގ ޑިރެކްޓަރ ރިފްއަތު މުޙައްމަދު ވިދާޅުވީ މިއޭޓީއެމް ހުންނަ ތަން އިމާރާތް ކޮށްފައިވަނީ މުސްތަގުބަލަށް ވިސްނާފައިކަމަށާއި އެގޮތުން އޭޓީއެމް މެޝިން އިތުރުކުރަން ޖެހިއްޖެނަމަ އެއްއިމާރާތުގައި އިތުރު 1 ނުވަތަ 2 އޭޓީއެމް ބެހެއްޓޭނެ ގޮތަށް ފަރުމާ ކުރެވިފައި ވާކަމަށެވެ.

ރިފްއަތު ވިދާޅުވީ ބޭންކް އޮފް މޯލްޑިވްސްގެ ބްރާންޗުތަކުން ދެވޭ ހިދުމަތްތައް އަވަސްކުރުމުގެ ގޮތުން އިންޓަނެޓް ބޭންކިންގެ ހިދުމަތް ފުޅާކުރުމަށް މިހާރު ހާއްސަ އިސްކަމެއް ދީފައިވާ ކަމަށެވެ.

ކުޅުދުއްފުށީގައި މިއަދު ހުޅުވި އޭޓީއެމްއިން ހުންނަނީ އެސްޓީއޯ ބޭސް ފިހާރައިގެ ހުޅަނގުގަ އެވެ. އެ ސަރަހައްދަކީ އުތުރުގެ ތިން އަތޮޅުގެ ރައްޔިތުން ހިދުމަތް ހޯދާ ކުޅުދުއްފުށީ ރީޖަނަލް ހޮސްޕިޓަލް ހުންނަ ސަރަހައްދެވެ.

[yass cats=85]