އާރލީ އިންޓަވެންޝަން ޕްރޮގްރާމެއް އޭއީސީގައި ފަށަނީ

އާރލީ އިންޓަވެންޝަން ޕްރޮގްރާމެއް ހދ. އަތޮޅު ތައުލީމީ މަރުކަޒުގައި ފަށަން ހަމަޖެހިއްޖެ އެވެ.

މި ޕްރޮގްރާމަކީ ޅަ އުމުރުގައި ނުކުޅެދުންތެރިކަން ހުންނަ ކުދިން ދެނެގަތުމަށާއި ނުކުޅެދެންތެރިކަން ހުންނަ ކުދިން ގުރޭޑް އެކަކަށް ދާންވާއިރަށް އެކުދިންގެ ފެންވަރާއި ހުނަރު އެހެންކުދިންނާ އެއް ހަމައެއް ކުރަން ފަށާ ޕްރޮގްރާމެއްކަމުގައި އޭއީސީގެ ޕްރިންސިޕަލް އިބްރާހިމް ރަޝީދު ވިދާޅުވި އެވެ.

މި ޕްރޮގްރާމް އޯގަސްޓް މަހު ފެށެން ހަމަޖެހިފައިވާއިރު މި ޕްރޮގުރާމުށް މިހާތަނަށް ޕްރީ ސްކޫލުގައި ކިޔަވަމުންދާ ނުކުޅެދުންތެރިކަން ފާހަގަ ކުރެވިފައިވާ 10 ކުދިން ހޮވައިފާވެ އެވެ.

މި ކުދިން ތަމްރީނުކޮށްދެއްވާނީ މިހާރު އޭއީސީގެ ސެން ކުލާސްތަކުގައި ކިޔަވައިދެއްވަމުންދާ 5 ޓީޗަރުންގެ ތެރެއިން 3 ޓީޗަރުންކަމުގައި ޕްރިންސިޕަލް ވިދާޅުވި އެވެ.

މި ޕްރޮގުރާމުގައި ކިޔަވައިދިނުމަށް މި ކުދިންނަށް ހާއްސް ކުލާހެއް ތައްޔާރުކުރެވޭއިރު މި ޕްރޮގްރާމާ ބެހޭ މައުލޫމާތު ދަނީ ބެލެނިވެރިންނަށް ދެމުންނެވެ. އަދި މި ކުލާހުގައި ކިޔަވައިދޭނެ ޓީޗަރުން ދަނީ ތަމްރީނު ހާސިލުކުރަމުންކަމުގައިވެސް އޭނާ ވިދާޅުވި އެވެ.

އެއީސީގައި މިހާރުވެސްދަނީ ނުކުޅެދުންތެރިކަން ހުންނަ ކުދިންނަށް ހާއްސްކޮށްގެން ކުލާހެއް ހިންގަމުންނެވެ.