ފުޅާ ދާއިރާއެއްގައި ކުޅުދުއްފުއްޓަށް މަސްތުވާތަކެތި އެތެރެކޮށް ވިއްކާ ބޮޑެއް ފުލުހުން އަތުލައިގަނެފި

ފުޅާ ދާއިރާއެއްގައި ކުޅުދުއްފުއްޓަށް މަސްތުވާތަކެތި އެތެރެކޮށް އެތަކެތީގެ ވިޔަފާރިކުރާ ބޮޑެއްކަމަށް ތުހުމަތުކުރެވޭ މީހަކު މަސްތުވާތަކެއްޗާއެކު ފުލުހުން މިއަދު އަތުލައިގެންފިއެވެ.

ފުޅާ ދާއިރާއެއްގައި ކުޅުދުއްފުއްޓަށް މަސްތުވާތަކެތި އެތެރެކޮށް އެތަކެތި ވިއްކާކަމުގެ ތުހުމަތުގައި ފުލުހުން ހައްޔަރުކޮށްފައިވަނީ 39 އަހަރުގެ ފިރިހެނެއް ކަމަށް ފުލުހުންގެ މީޑިއާ މައުލޫމަތުދެ އެވެ. އެހެންނަމަވެސް އެމީހައާ ބެހޭ އިތުރު އެއްވެސް މައުލޫމާތެއް ފުލުހުނެއް ނުދެ އެވެ.

“ކުޅުދުއްފުށީ އޮންލައިނަށް” އެނގިފައިވާގޮތުގައި މިކަމުގެ ތުހުމަތުގައި ހައްޔަރުކޮށްފައިވަނީ ކުޅުދުއްފުށީ، އަބަދަށްހިޔާގެ އަބުދުލް ހަމީދު ހަސަނެވެ.

ފުލުހުން ބުނީ އޭނާ ފުލުހުންގެ ބެލުމުގެ ދަށަށް ގެނެސްފައިވަނީ ކުޅުދުއްފުއްޓަށް މަސްތުވާތަކެތި އެތެރެކޮށް، ފުޅާ ދާއިރާއެއްގައި އެތަކެތީގެ ވިޔަފާރިކުރަމުންދާކަމަށް، އަޕަރ ނޯތު ޕޮލިސް ޑިވިޝަންގައި ހަރަކާތްތެރިވާ ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން، ކުޅުދުއްފުށި ޕޮލިސް ސްޓޭޝަނާއި ޢިންޓެލިޖެންސް ގުޅިގެން ހިންގި އޮޕަރޭޝަނެއްގައި މިއަދު ހެދުނެވެ.

މިއަދު ހެނދުނު ކުޅުދުއްފުއްޓަށް އައި މާލެ ދަތުރުކުރާ ބޯޓަކުން ގެންދިޔަ ފޮށިގަނޑަކާ އޭނާ ހަވާލު ވުމުން، އޭނާއާއި އެ ފޮށިގަނޑު ފުލުހުންގެ ބެލުމުގެ ދަށަށް ގެނެސް ބަލައި ފާސްކުރި އިރު މަސްތުވާތަކެތި ކަމަށް ބެލެވޭ އެއްޗެއް ހުރި 3 ރަބަރު ޕެކެޓާއި ބާޒާރު ކޮތަޅެއްގެ އިތުރުން މަސްތުވާތަކެތި ބަންދުކުރަން ބޭނުންކުރާ ޒާތުގެ ގިނަ އަދަދެއްގެ ކުދި ޕެކެޓް ތަކެއް ފެނިފައިވާކަމަށް ފުލުހުން މައުލޫމާތުދެ އެވެ.

އޭނާ ފުލުހުންގެ ބެލުމުގެ ދަށަށް ގެނެސް، ކުޑަކަމުދާތަކެތި ތަހުލީލު ކުރިއިރު މަސްތުވާތަކެތީގެ ބާވަތަކަށް އޭނާ ޕޮޒިޓިވް ވެފައިވާކަމަށް ފުލުހުން ބުނެ އެވެ.

މިމައްސަލަ ހދ. ކުޅުދުއްފުށި ޕޮލިސް ސްޓޭޝަނުން ދަނީ ތަހުގީގު ކުރަމުންނެވެ.