ހޯރަފުށީގެ ދެ ޒުވާނަކު މަސްތުވާތަކެއްޗާއެކު ހައްޔަރު ކޮށްފި

ހަދީޖާ އާދަމް

ޕޮލިސް އިންޓެލިގެންސާއި ހއ ދިއްދޫ ޕޮލިސް ސްޓޭޝަން އަދި ހއ ހޯރަފުށި ޕޮލިސް ސްޓޭޝަން ގުޅިގެން ހިންގި ހާއްސަ އޮޕަރޭޝަނެއްގައި މިދިޔަ ބުދަދުވަހުގެ ރޭ ހޯރަފުށީގެ ދެ ޒުވާނަކު މަސްތުވާތަކެއްޗާ އެކު ހައްޔަރު ކޮށްފި އެވެ.

ފުލުހުން ބުނިގޮތުގައި އެމީހުން ހައްޔަރުކުރީ އެރޭ މެންދަމު 00:15 ހާއިރު ކަމަށާއި، އެއީ 19 އަހަރުގެ ދެ ފިރިހެނުން ކަމަށެވެ .

އެމީހުން ދިރިއުޅުނު ކޮޓަރި ބަލައި ފާސްކުރުމުގެ ތެރެއިން އެ ކޮޓަރީގައި ހުރި އައިސް އަލަމާރި އާއި އަންނައުނު އެޅުމަށް ބޭނުން ކުރާ އަލަމާރި ދޭތެރެއިން ވަނީ މަސްތުވާ ތަކެތި ކަމަށް ޝައްކު ކުރެވޭ އެއްޗެއް ހުރި ފިލްމް ހުސްކުރި ދަޅަކާ، އެ ކޮޓަރީ ގައި ހުރި ކަރުދާހު ފޮށިގަނޑެއް ތެރެއިން މަސްތުވާ ތަކެތި ކަމަށް ޝައްކު ކުރެވޭ އެއްޗެއް ހޭކިފައި ހުރި ސެލޯފިން ގަނޑަކާއި، ބޮނަކުއާރ ބްރޭންޑް 1500 އެމްއެލް ހުސްފުޅިއެއްގެ އިތުރުން އެކޮޓަރި ހުރި ފާހާނަގައި ހުރި ރެކެއް ގެ މަތިން ވެސް ވަނީ މަސްތުވާ ތަކެތި ކަމައް ޝައްކު ކުރެވޭ އެއްޗެއް ހުރި ދަޅެއް ފެނިފަ އެވެ.

ހއ ހޯރަފުށީގެ މެޖިސްޓްރޭޓް ކޯޓުން ވަނީ ދެ މީހުންގެ ބަންދައް 10 ދުވަހުގެ މުއްދަތެއް ދީފަ އެވެ.

މި މައްސަލަ މިހާރު ދަނީ ހއ ޕޮލިސް ސްޓޭޝަން ގެ ފަރާތުން ތަހްގީގު ކުރަމުންނެވެ.