ޤުރުއާނާ ބެހޭ މަރުކަޒުން ހިންގުމަށް ހަމަޖެހިފައިވާ ޤާރީ ކޯހުގެ އޮރިއެންޓޭޝަން ބާއްވައިފި

ކީރިތި ޤުރުއާނާ ބެހޭ މަރުކަޒުން ކުޅުދުއްފުށީގައި ހިންގުމަށް ހަމަޖެހިފައިވާ ޤާރީ ކޯސް ލެވެލް 1 ގެ ބައިވެރިން ހޮވާ އޮރިއެންޓޭޝަން ޕްރޮގްރާމް ބާއްވައިފި އެވެ.

މިއަދު 10:00 ގައި ތިލަދެކުނު ސިނަމާގައި ކުރިއަށްދިޔަ މި ޕްރޮގްރާމްގައި ވަނީ ޤުރުއާނާ ބެހޭ މަރުކަޒުން ހިންގާ ކޯސްތަކާ ގުޅޭގޮތުން މައުލޫމާތު ދީފައެވެ. އަދި މީގެ އިތުރުން ޤުރުއާނާ ބެހޭ މަަރުކަޒުގެ ކަންތައްތަކާއި ބެހޭގޮތުން މައުލޫމާތު ފޯރުކޮށްދެއްވި އެވެ.

މި ޕްރޮގްރާމްގައި ވާހަކަފުޅު ދައްކަވަމުން ޤުރުއާނާބެހޭ މަރުކަޒުގެ ޑެޕިއުޓީ ޕްރިންސިޕަލް އަބްދުލް ރަހްމާން ޔޫނުސް ދެއްކެވި ވާހަކަފުޅުގައި މި ރަށަކީ ޤުރުއާނުގެ ޢިލްމު ވަރަށް ބޮޑަށް ބޭނުންވެފައިވާ ރަށެއްކަން ފާހަގަކުރެއްވި އެވެ. އަދި ރާއްޖޭގެ އެކި ކަންކޮޅުތަކުގައި ޤުރުއާނާ ބެހޭ މަރުކަޒުގެ 8 ސެންޓަރެއް ހުޅުވިފައިވާއިރު މިއަހަރު ނިމުމުގެ ކުރިން ކުޅުދުއްފުށީގައިވެސް ޤުރުއާނާ ބެހޭ މަރުކަޒުގެ ސެންޓަރެއް ހުޅުވުމުގެ މަސައްކަތް ކުރަމުން ގެންދަވާ ކަމަށްވެސް ވިދާޅުވި އެވެ.

މީގެ އިތުރުން މި ކޯހުން ރަނގަޅު ނަތީޖާތަކެއް ނެރެފިނަމަ އިތުރު ކޯސްތައް މި ރަށުގައި ހިންގުމަށް ހަމަޖެހިފައިވާކަން އިޢުލާން ކުރައްވަމުން ޤުރުއާނުގެ ޢިލްމަށް އަހަމިއްޔަތުކަން ނުދެވޭ މިންވަރުގެ މައްޗަށް އަލިއަޅުވާ ލެއްވި އެވެ.

ދެމަސްދުވަހަށް ދިގުދެމިގެންދާ މި ޤާރީ ކޯހަށް ޖުމްލަ 128 ފަރާތަކުން ކުރިމަތިލާފައިވާއިރު ހުރިހާ ފަރާތްތަކަށްވެސް ވަނީ ފުރުސަތު ދީފައެވެ. އޯގަސްޓްމަހު ފެށުމަށް ހަމަޖެހިފައިވާ މިކޯހުގައި ކިޔަވާދިނުމަށް ހަމަޖެހިފައިވަނީ ޤުރުއާނާ ބެހޭ މަރުކަޒުގައި ކިޔަވާދީފައިވާ ކުޅުދުއްފުށީގެ ދެ ބޭފުޅުން ކަމުގައިވާ މުހައްމަދު އާދަމް ހުރާ އަދި ޝިޔާމާ އިބްރާހީމް ކަސަބުގެ އެވެ.

ކުޅުދުއްފުށީ ކައުންސިލު މައުލޫމާތު ދެއްވި ގޮތުގައި މިކޯސް ކުރިއަށްގެން ދިއުމަށް ހަމަޖެހިފައިވަނީ 4 ކުލާހަކަށް ބަހާލައިގެންނެވެ. ކޯސްކުރިއަށް ދާނީ އިރުމަތި އަވަށު ޕްރީސްކޫލުގަ އެވެ.

މި ކޯހަށް ބައިވެރިން ހޮވުމުގެ އިންޓަވިއު ހުކުރު ދުވަހު ކުރިއަށް ގެންގޮސްފައިވާއިރު ކޯސް ފެށުމަށް ހަމަޖެހިފައިވަނީ އޯގަސްޓް މަހު 3 ވަނަ ދުވަހު އެވެ. އެވެ.