ކުމުންދޫ “ހޯރަ” ފެރީ ފަރަށް އަރައި ގިނަ ބަޔަކަށް އަނިޔާވެއްޖެ

ކުޅުދުއްފުށިން ފުރައިގެން ކުމުންދޫއަށް ދިޔަ އެ ރަށު “ހޯރަ” ފެރީ ކުމުންދޫ ނެރުގެ ފައިކައްޓަށް އަރައި ފެރީން ދަތުރުކުރި ގިނަ ބަޔަކަށް އަނިޔާ ވެއްޖެ އެވެ.

މިއަދު މެންދުރު 12:30 އެހާކަށްހާއިރު ފެރީ ކުމުންދޫ ނެރު މައްޗަށް އެރި އިރު މިދޯނިިން 40 ފިރިހެނުންނާއި 17 އަންހެނުންނާއި 03 ކުޑަކުދިންނާއެކު ޖުމްލަ 60 މީހުން ދަތުރުކުރިއެވެ.

ކައުންސިލުގެ ނައިބު ރައީސް އަމީން މުހައްމަދު ވިދާޅުވީ ނެރު މައްޗަށް އެރުމުގެ ސަބަބުން ދޯންޏާއި، ދޯނިން ގެންދިޔަ ބައެއް ތަކެއްޗަށް ބޮޑެތި ގެއްލުންތައް ލިބިފައިވާ ކަމަށެވެ.

އެހެންނަމަވެސް އެއްވެސް މީހަކަ ބޮޑު އަނިޔާއެއް ލިބިފައިނުވިނަމަވެސް ފެރީން ދަތުރު ކުރި ބައެއް މީހުންނަށް ކުދި އަނިޔާ ލިބިފައިވާ ކަމަށް އޭނާ ވިދާޅުވި އެވެ.

ކުމުންދޫ ސިއްހީ މަރުކަޒުން ބުނީ އެ ހާދިސާގައި އަނިޔާވެގެން ގާތްގަނޑަކަށް 15 މީހަކު އެ މަރުކަޒުން ފަރުވާ ހޯދާފައިވާ ކަމަށާއި އޭގެ ތެރެއިން އިތުރު ފަރުވާ ދިނުމަށްޓަކައި 2 އަންހެނަކާއި 6 ފިރިހެނަކު ކުޅުދުއްފުށީ ހޮސްޕިޓަލަށް ފޮނުވާލެވިފައިވާ ކަމަށެވެ.

ސިއްހީ މަރުކަޒުން ބުނީ ބޮޑެތި އަނިޔާއެއް ފާހަގަ ކުރެވިފަ އަދި ނެތް ކަމަށާއި އެހެންނަމަވެސް ގިނަ ބައެއްގެ ހަށިގަނޑުގެ އެކި ތަންތަން ފަޅައިގެން ގޮސް ކެފިފައިވާ ކަމަށެވެ.

އެރަށުން ވާހަކަ ދެއްކި މީހަކު ބުނީ ދޯނި ތޮށި މައްޗަށް އެރިއިރު ގިނަ އަދަދެއްގެ އަންހެނުންނާއި ކުޑަ ކުދިން ތިބިކަމަށާއި އަނިޔާވި ފަރާތަކަށް ކުމުންދޫ ސިއްހީ މަރުކަޒަށް ގެންދެވި ފަރުވާދީފައިވާ ކަމަށެވެ.

ފަރަށް އެރި ދޯނި ސަލާމްތަކުރުމުގެ މަސައްކަތް އެމްއެންޑީއެފް ނޯދަން އޭރިޔާގެ ސިފައިން ފަށާފައިވާއިރު އެ ރަށުގެ ރައްޔިތުންނާ ފުލުހުންވެސް އެ މަސައްކަތުގައި އަންނަނީ ބައިވެރިވަމުންނެވެ.

މިދިޔަ މެއި މަހުގެ ތެރޭގައި ވެސް ކުމުންދޫ ނެރު މައްޗަށް ވަދު ދޯންޏެއްވަނީ ބަނޑުން ޖަހާލާފަ އެވެ.