ފިތުރު އީދުގައި “ބައިބަލާ ޗެލެންޖް”ގެ ނަމުގައި ބައިބަލާ މުބާރާތެއް ބާއްވަނީ

ހަދީޖާ އާދަމް

ކުޅުދުއްފުށީގައި މި އަހަރުގެ ފިތުރު އީދުގައިވެސް “ބައިބަލާ ޗެލެންޖު”ގެ ނަމުގައި ބައިބަލާ މުބާރާތެއް ބާއްވަން މަސައްކަތް ކުރަމުން އަންނަ ކަމަށް އެ މުބާރާތް އިންތިޒާމުކުރާ ފަރާތުން ބުނެފި އެވެ.

ބައިބަލާ މުބާރާތް އިންތިޒާމު ކުރުމުގައި އިސްކޮށް އުޅޭ ޒުވާނެއް ކަމަށްވާ އަކްރަމް މުހައްމަދު މި ނޫހަށް މައުލޫމާތު ދެމުން ބުނީ މި މުބާރާތް ކުރިއަށް ގެންދެވޭނީ މަދުވެގެން 5 ނޫނީ 6 ޓީމު ބައިވެރިވުމުން ކަމަށާއި މިއީ ކުޅުދުއްފުށީގެ ޒުވާނުންނަށް ހާއްސަކޮށްގެން ކުރިއަށް ގެންދާ މުބާރާތެއް ކަމަށެވެ.

ކުޅުދުއްފުށީ ޒުވާނުންގެ ބަޔަކާ، މިޝްގާލް ބޮޑުބެރު ގްރޫޕާ ގުޅިގެން އިންތިޒާމުކުރާ މި އިވެންޓް ކުރިއަށް ގެންދިއުމަށް ހަމަޖެހިފައި ވަނީ ފިތުރު އީދުގެ ދެވަނަ އީދު ދުވަހުގެ ރޭ އަމީރު އަމީން ސްކޫލް ކުރިމަތީ ހިއްކި ސަރަހައްދުގައެވެ.

އަކްރަމް ބުނީ މުބާރާތުގައި އިނާމުދޭނެ ވަނަތައް އަދި ހަމަޖެހިފައި ނުވާ ކަމަށާއި މެއިން ސްޕޮންސަރ ހަމަޖެހުނުހާ އަވަހަކަށް ވަނަތައް ހިއްސާކުރެވޭނެ ކަމަށެވެ.

މިމުބާރާތުގައި ބައިވެރިވުމަށް އެދޭ ފަރާތްތަކަށް ފޯރމް ދޫކުރުން މިމަހުގެ 3 ވަނަދުވަހުން ފެށިގެން ކޭބަލް ޕުލަސް އަދި ކޭބަލް ޗޮއިސް އިން ލިބެން ހުންނާނެ ކަމަށް އެ ފަރާތުން މައުލޫމާތު ދެއެވެ. އަދި ފޯމް ލުމުގެ ފުރުސަތު ހަމަވަނީ މި މަހުގެ 20 ގެ ނިޔަލަށެވެ.