ބަންޑާރަ މަގުގެ މަސައްކަތް ހުއްޓިފައިވަނީ މެޝިނަރީތައް ހަލާކުވެގެން: އެމްއާރުޑީސީީ

ކުޅުދުއްފުށީ ބަންޑާރަ މަގުގެ މަސައްކަތް ހުއްޓިފައިވަނީ މެޝިނަރީތައް ހަލާކުވެގެން ކަމުގައި މޯލްޑިވްސް ރޯޑް ޑިވެލޮޕްމެންޓް ކޯޕަރޭޝަން (އެމްއާރުޑީސީ) އިން ބުނެފި އެވެ.

އެމްއާރުޑީސީގެ މެނޭޖިން ޑިރެކްޓަރ އިބްރާހިމް ނަޒީމް މި ނޫހަށް މައުލޫމާތު ދެއްވަމުން ވިދާޅުވީ މަސައްކަތް ހުއްޓިފައިވަނީ މެޝިނަރީ އާއި ސާމާނުތައް ހަލާކުވެގެން ކަމަށެވެ. އަދި އެފަދަ ތަކެތި މަރާމާތުކުރުމަށް ބޭނުންވާ އެއްޗެހި ރާއްޖެއިން ލިބެން ނެތުމުން މިތަކެތީގެ ސްޕެއަރ ޕާރޓްސް ބޭރުން ގެނުމުގެ މަސައްކަތް މިހާރު ކުރިއަށްދާ ކަމަށް ނަޒީމް ވިދާޅުވި އެވެ.

މި ހަފުތާގެ ތެރޭގައި އެ ތަކެތި ލިބޭނެ ކަމަށް އުއްމީދުކުރައްވާ ކަމަށާއި އެ ތަކެތި ލިބުނުހާ އަވަހަކަށް މަސައްކަތް އަލުން ފަށާނެ ކަމަށް ވެސް ނަޒީމް ވިދާޅުވި އެވެ.

ބަންޑާރަ މަގުގެ މަސައްކަތް ހުއްޓިފައިވާތީ އެކަމާ ބެހޭގޮތުން މި ނޫހުން ދެންނެވި ސުވާލަކަށް ޖަވާބު ދެއްވަމުން ކުޅުދުއްފުށީ ކައުންސިލުގެ ރައީސް އަލީ މުހައްމަދު ވިދާޅުވީ މަސައްކަތް ހުއްޓިފައިވާ ސަބަބާއި ބެހޭ އެއްވެސް މައުލޫމާތެއް ނޭނގޭ ކަމުގަ އެވެ. އަދި ރަސްމީކޮށް ކައުންސިލަށް މަސައްކަތް ހުއްޓިފައިވާ ސަބަބު އަންގާފައި ނުވާ ކަމަށް ރައީސް ވިދާޅުވި އެވެ.

ތިން މަސް ދުވަހުގެ ތެރޭގައި މަގުގެ މަސައްކަތް ނިންމާނެ ކަމަށް އެމްއާރުޑީސީ އިން ބުނެފައިވާ ކަމަށް ކައުންސިލުގެ ރައީސް ވިދާޅުވި އެވެ.

ކުޅުދުއްފުށީގައި ތާރު އަޅައިގެން ރަނގަޅު ފެންވަރަކަށް ހެދުމަށް ސަރުކާރުން ނިންމާފައިވާ ހުރިހާ މަގެއް މި އަހަރު ނިމުމުގެ ކުރިން ހަދާ ނިންމާލެވޭނެ ކަމަށް އެމްއާރުޑީސީ އިން ކުރިން ބުނެފައިވެ އެވެ.

އެހެންނަމަވެސް މި އަހަރުގެ މާރޗު މަހުގެ 14 ވަނަ ދުވަހު ބަންޑާރަ މަގުގެ މަސައްކަތް ފެށިފަހުން މިހާތަނަށް މަގުގެ މާ ބޮޑު މަސައްކަތެއް ކުރެވިފައި ނުވާކަން ފާހަގަ ކޮށްލެވެ އެވެ.

ތާރު އަޅައިގެން ރަގަޅު ފެންވަރަކަށް ހަދަން ނިންމާފައިވަނީ ކުޅުދުއްފުށީ ބަނޑާރަމަގުގެ އިތުރުން ނިކަގަސްމަގާއި މަގާމް މަގެވެ.

ކުޅުދުއްފުށީ އަމީނީމަގުގައި ތާރުއަޅާ މިހާރު ބޭނުން ކުރަމުންދިޔަ ނަމަވެސް އަމީނީމަގުގައި ހަދާފައިވާ ވެހިކަލް ޕާކް ކުރާ ބައެއް ތަންތަނުގައި ގައު އަތުރާފަ އެއް އަދި ނުވެ އެވެ. އަދި އަމީނީމަގުގައި އެޅި ތާރުގައި ބޮޑެތި ރެނދުތަކެއް ލައި ފަޅައިގެން ގޮސްފައިކަންވެސް ފާހަގަކޮށްލެވެ އެވެ.