އަތޮޅު ފެރީ ކުމުންދޫއަށް ނުދާތީ ރައްޔިތުންނަށް ބޮޑެތި ދަތިތަކެއް!

Jul 22, 2014

ހދ އަތޮޅު ފެރީ ހދ. ކުމުންދޫއަށް ނުދާތީ އެ ރަށު ރައްޔިތުންނަށް ބޮޑު ދަތިތަކަކާ ކުރިމަތިވަމުން އަންނަ ކަމަށް ކުމުންދޫ ކައުންސިލުގެ ނައިބު ރައީސް އަމީން މުހައްމަދު ވިދާޅުވެއްޖެ އެވެ.

މި ނޫހުން ދެންނެވި ސުވާލަކަށް ޖަވާބު ދެއްވަމުން ކުމުންދޫ ކައުންސިލުގެ ނައިބު ރައީސް އަމީން މުހައްމަދު ވިދާޅުވީ އަތޮޅު ފެރީ އެ ރަށަށް ނުދާތާ މަސް ދުވަސް ވެފައިވާ ކަމަށެވެ. އަދި މިހާރު ރައްޔިތުން ކުޅުދުއްފުށްޓަށް ދަތުރުކުރަނީ ކުދި ދޯނި ތަކުގައި ކަމަށްވެސް އޭނާ ވިދާޅުވި އެވެ.

ކުމުންދޫގައި މިހާރު ދިރިއުޅޭ އާބާދީގެ 80 އިންސައްތަ އަކީ ދަނޑުވެރިން ކަމަށް ވާއިރު ކޮންމެ ހޮނިހިރަކު ކުޅުދުއްފުށްޓަށް އެތަކެތި ވިއްކުމަށް އަންނަން ޖެހޭ ކަމަށާއި، ކުމުންދޫގެ ރައްޔިތުން ވިޔަފާރި ކުރުމަށާއި ހޮސްޕިޓަލަށްވެސް އަންނަން ޖެހެނީ ކުޅުދުއްފުށްޓަށް ކަމަށް އަމީން ވިދާޅުވި އެވެ. މި ގޮތަށް ދަތުރުތައް މެދުކެނޑުމުން ރައްޔިތުންނަށް ބޮޑު ދަތިތަކެއް ވާކަމަށް އޭނާ ވިދާޅުވި އެވެ. އަދި ކުމުންދޫގައި އާސަންދައިން ބޭސް ލިބެން ނުހުންނަކަން ވެސް ނައިބު ރައީސް ފާހަގަކުރެއްވި އެވެ.

ހދ. މަކުނުދޫ، ވައިކަރަދޫ އަދި ނޭކުރެންދޫއަށް ވެސް ދަތުރުކުރާ ފެރީ ކުމުންދޫއަށް ނުވަންނަނީ ހުޅަނގު މޫސުން ކަމަށްވެފައި ކަނޑު ގަދަވެ ކުމުންދޫ ބަނދަރަށް ވަންނަން އުނދަގޫ ވުމުން ކަމަށް އޭނާ ވިދާޅުވި އެވެ. އެހެންނަމެވެސް މަޑު ދުވަސްތަކުގައިވެސް ކުމުންދޫއަށް ނުވަދެ ދާ ކަމަށް ނައިބު ރައީސް ވިދާޅުވި އެވެ.

އޭނާ ވިދާޅުވީ މިއަދަކީވެސް މަޑު ދުވަހެއް ކަމަށާއި ނަމަވެސް މިއަދުވެސް ކުމުންދޫ ބޭރުގައި ފެރީ އޮވެފައި ދިޔައީ ކަމަށެވެ.

މި މައްސަލަ ހައްލުކުރުމަށް ކުމުންދޫ ކައުންސިލުން ދަނީ ކަމާބެހޭ ހުރިހާ ފަރާތްތަކަކާ ވާހަކަ ދައްކަމުން ކަމަށް ކުމުންދޫ ކައުންސިލުން މައުލޫމާތު ދެއެވެ.

ކުމުންދޫގައި އަމިއްލަ ފަރާތަކުން ދުއްވަމުން ގެންދިޔަ ފެރީ ފަރަށް އަރައި ބޭނުން ނުކުރެވޭ ވަރަށް ހަލާކުވެފައިވާތީ އެކަން އަތޮޅު ކައުންސިލުގެ ސަމާލުކަމަށްވެސް ގެނެސްފައިވާ ކަމަށް ކައުންސިލުން ބުންޏެވެ.

މި މައްސަލައާ ގުޅިގެން ހދ. އަތޮޅު ކައުންސިލުގެ ނައިބު ރައީސް އަހުމަދު އާތިފް ވިދާޅުވީ މިކަން މި ހިސާބަށް ގޮސްފައި މިވަނީ ކުމުންދޫ ކައުންސިލުން އެއްބާރުލުން ނުދެއްވުމުގެ ސަބަބުން ކަމަށެވެ.

އާތިފް ވިދާޅުވީ އަތޮޅު ފެރީ ކުމުންދޫއަށް ނުވަންނަތާ އެއްމަސް ދުވަސް ނުވާނެ ކަމަށެވެ. އަދި ފެރީ މިހާރު ކުމުންދޫއަށް ނުވަންނަނީ ކަނޑު ގަދަވެ ކުމުންދޫއަށް ވަނުމަކީ ނުރައްކާތެރި ކަމަކަށް ވާތީ ކަމަށް އާތިފް ވިދާޅުވި އެވެ.

ކުމުންދޫއަށް މި ފެރީ އަންނަނީ އެހެން ރަށްރަށުން މީހުން އަރުވައިގެން ކަމުން ކުމުންދޫއަށް ވަނުމުގެ “ރިސްކް” ނެގުމުން އެތައް ބައެއްގެ ފުރާނައަށް ގެއްލުންވެދާނެ ކަމަށް އާތިފް ވިދާޅުވި އެވެ. އަދި ފެރީގެ ކައްޕި ކުމުންދޫއަށް ވަނުމަށް ދެކޮޅު ހެދުމުން އިތުރަށް ކައުންސިލުން ފެރީ ކުމުންދޫއަށް ވެއްދުމަށް ބާރު ނޭޅޭނެ ކަމަށްވެސް އޭނާ ވިދާޅުވި އެވެ.

އާތިފް ވިދާޅުވި ގޮތުގައި ކުމުންދޫއަށް ފެރީ ވަންނަން އުޅެނިކޮށް ހިތާމަވެރި ހާދިސާއެއް ހިނގާފާނެތީ އަތޮޅު ކައުންސިލުން ވާނީ ކުމުންދޫ ކައުންސިލަށް ކުމުންދޫގެ ރައްޔިތުން ކުޑަ ދޯންޏެއްގައި ފެރީއާ ހަމައަށް ނެރުމަށް އެދިފަ އެވެ. އެހެންނަމެވެސް ކުމުންދޫ ކައުންސިލުން އެކަން އެގޮތަށް ކޮށްފައި ނުވާއިރު އެކަން ކައުންސިލުން ނުކުރީ އެފަރާތަށް ލިޔުމުން އެކަން ނާންގާތީ ކަމަށް ކުމުންދޫ ކައުންސިލުން ބުނެފައިވާ ކަމަށް އާތިފް ވިދާޅުވި އެވެ.

އެ ރަށުގައި އަމިއްލަ ފަރާތަކުން ދުއްވަމުންދިޔަ ފެރީ މިހާރު ހަލާކުވުމާ ގުޅިގެން ކުމުންދޫ ކައުންސިލުން ވަނީ އެއްބާރުލުން ދޭނެ ކަމަށް ބުނެފަ އެވެ. މިހާރު ކުރިއަށް ދަނީ ފެރީ ހިދުމަތް ފޯރުކޮށްދޭ ފަރާތާ ގުޅިގެން ލިޔުން ތައްޔާރުކުރުމުގެ މަސައްކަތް ކަމަށް އާތިފް ވިދާޅުވި އެވެ.

އާތިފް ވިދާޅުވީ ރައްޔިތުންނާ ގުޅުންހުރި ކަންތައްތައް ހައްލުކުރެވޭނީ ކައުންސިލުން އެ ކަންކަމަށް އެއްބާރުލުން ދީގެން ކަމަށެވެ.

އަމިއްލަ ފަރާތަކުން ހިދުމަތް ދެމުންގެންދިޔަ “ހޯރަ” ފެރީ ކުމުންދޫ ފަރަށް މި މަހުގެ ފަސް ވަނަ ދުވަހު އަރާފައިވާއިރު އެ ހާދިސާގައި ފެރީ ބޭނުން ނުކުރެވޭ ވަރަށް ހަލާކުވެ 15 މީހަކަށް އެކިވަރުގެ އަނިޔާ ލިބިފައިވެ އެވެ.

ކުމުންދޫ ފަޅު ހަދާފައިވާ ގޮތުން އެ ފަޅަށް ވަނުމުގެ ތެރޭގައި ހިތާމަވެރި އެތައް ހާދިސާއެއް ވަނީ ހިނގާފައެވެ.

މިލިޔުމާއި ގުޅޭ