ފަލަސްތީނާއެކު ތިބިކަން ހާމަކޮށްދިނުމަށް ހދ. އަތޮޅުގެ 13 ރަށެއްގައި އެއް ވަގުތެއްގައި ހިނގާލުމެއް ބާއްވަނީ

Jul 25, 2014

އިޒްރޭލުން ފަލަސްތީނުގެ ޣައްޒާއަށް ދެމުންގެންދާ ހަމަލާތަކާ ދެކޮޅު ހަދައި ފަލަސްތީނުގެ މުސްލިމުންނާއެކު ހދ. އަތޮޅުގެ ރައްޔިތުން ތިބިކަން ހާމަކޮށްދިނުމުގެ ގޮތުން ހިނގާލުމެއް ބާއްވަން ހަމަޖެހިއްޖެ އެވެ.

ހދ. އަތޮޅު ކައުންސިލުން އިސްނައިގެން ކުރިއަށް ގެންދާ މި ހަރަކާތާ ބެހޭގޮތުން މި ނޫހަށް މައުލޫމާތު ދެއްވަމުން އަތޮޅު ކައުންސިލުގެ ނައިބު ރައީސް އަހުމަދު އާތިފް ވިދާޅުވީ މި ހިނގާލުން ހދ އަތޮޅުގެ 13 ރަށުގައި އެއް ވަގުތެއްގައި އޮންނާނެ ކަމަށެވެ.

ކުޅުދުއްފުށީގައި މި ހިނގާލުން އޮންނާނީ އަންނަ ހޮނިހިރު ދުވަހު 16:30 ގައި އެވެ. އަތޮޅު ކައުންސިލު އިދާރާ ކުރިމަތިން ފަށަން ހަމަޖެހިފައިވާ މި ހިނގާލުން ނިންމާލަން ހަމަޖެހިފައިވަނީ ވެސް އަތޮޅު ކައުންސިލު އިދާރާގެ ކުރިމަތީގައި، ފަލަސްތީނުގެ ރައްޔިތުންނަށް ކުރެވޭ ހާއްސަ ދުއާ އަކުންނެވެ.

އާތިފް އިތުރަށް ވިދާޅުވީ މިއީ އަތޮޅު ކައުންސިލުން އިސްނައިގެން އިންތިޒާމުކުރި ހިނގާލުމެއް ކަމަށާއި ރަށުގެ ކުލަބް ޖަމާއަތަކުގެ އެއްބާރުލުން މި ހަރަކާތަށް ލިބިފައިވާ ކަމަށެވެ.

މި ހިނގާލުމުގައި ވީހާވެސް ގިނަ ރައްޔިތުން ބައިވެރިވެ އިޒްރޭލާ ދެކޮޅަށް އަޑު އުފުލުމަކީ އަތޮޅު ކައުންސިލުގެ ވަރަށް ބޮޑު އެދުމެއް ކަމަށް އެ ފަރާތު މައުލޫމާތުދެ އެވެ.

މީގެ ކުރިން އެސޯސިއޭޝަން އޮފް ކަލްޗަރަލް އެންޑް ސޯޝަލް ކޯޕަރޭޝަން (އޭސީއެސްސީ) އިން އިންތިޒާމުކޮށްގެން ކުޅުދުއްފުށީގައި ވަނީ އިޒްރޭލާ ދެކޮޅަށް އަޑު އުފުލުމުގެ ގޮތުން ލޮރީ ބުރެއް ބާއްވާފައެވެ. އަދި ހދ އަތޮޅުގެ އެހެން ބައެއް ރަށްރަށުގައިވެސް އިޒްރޭލާ ދެކޮޅަށް އަޑު އުފުލުމުގެ ގޮތުން ހަރަކާތްތަކެއް ހިންގާފައިވެ އެވެ.

ޣައްޒާއާ ދެކޮޅަށް އިޒްރޭލުން ދެމުންގެންދާ ލާއިންސާނީ ހަމާލާތަކަށް 17 ދުވަސް ވެފައި ވާއިރު އެ އުދުވާނުގައި ޝަހީދުވީ މީހުންގެ އަދަދު މިހާރު ވަނީ 750 އަށް ވުރެ މަތިވެފައެވެ. އަދި އެ ހަމަލާތަކުގެ ރައްދުގައި ހަމާސް ޖަމާއަތުން ދިން ހަމަލާތަކުގައި އިޒްރޭލު ސިފައިންގެ 32 މީހަކު ވަނީ މަރުވެފައެވެ.

މިލިޔުމާއި ގުޅޭ