ގައުމީ އެއާލައިން ކަމަށްވާ މޯލްޑިވިއަން އިން ސީ ޕްލޭންގެ ދަތުރުތައް މި މަހުގެ ތެރޭގައި ހއ އަތޮޅަށް ފެށުމަށް ހަމަޖެހިފައިވާ ކަމަށް އެ ކުންފުނިން ބުނެފި އެވެ.
އައިލެންޑް އޭވިއޭޝަނުގެ މެނޭޖިން ޑިރެކްޓަރ އަބުދުލް ހާރިޝް ވިދާޅުވީ މޯލްޑިވިއަންގެ ސީ ޕްލޭންގެ ދަތުރުތައް ފުޅާ ކުރުމުގެ ގޮތުން މި މަހު ހއ. އަތޮޅަށް ސީ ޕްލޭންގެ ދަތުރުތައް ފެށުމަށް ނިންމާފައިވާ ކަމަށެވެ.
ރިސޯޓްތަކަށް މޯލްޑިވިއަންގެ ސީ ޕްލޭންގެ ދަތުރުތައް ފެށުމަށްޓަކައި ހަދަންޖެހޭ އެއްބަސްވުންތައް ހަދައި، މަޝްވަރާތައް ކުރަމުންދާކަމަށްވެސް ހާރިޝް ވިދާޅުވި އެވެ.
މޯލްޑިވިއަންއިން މި އަހަރު އިތުރު ދެ ސީ ޕްލޭނެއް ރާއްޖެ ގެނައުމަށް ހަމަޖެހިފައިވާއިރު މިހާރުވެސް ދަނީ ދެ ސީ ޕްލޭނެއް އޮޕަރޭޓް ކުރަމުންނެވެ.
2013 ވަނަ އަހަރުގެ އޮކްޓޯބަރ މަހުގެ ތެރޭގައި ފެށި ސީ ޕްލޭންގެ ހިދުމަތް މިހާރު ދަނީ ތ. އަތޮޅަށް ދެމުންނެވެ.
