ޣައްޒާގެ ރައްޔިތުންނަށް އެހީވުމަށް ދިވެހި ރެޑް ކްރެސެންޓްގެ ހދ ބްރާންޗުގެ ފަރާތުން ފަންޑު ފޮއްޓެއް ހުޅުވައިފި

އިޒްރޭލުން ފަލަސްތީނަށް ދެމުންގެންދާ ހަމަލާތަކުގެ ސަބަބުން އަނިޔާ ލިބެމުންދާ ފަލަސްތީނު ރައްޔިތުންނަށް އެހީތެރިވުމުގެ ގޮތުން ދިވެހި ރެޑް ކްރެސެންޓްގެ ހދ ބްރާންޗުގެ ފަރާތުން ކުޅުދުއްފުށީގައި ފަންޑެއް ހުޅުވައިފި އެވެ.

“ފަލަސްތީން ރިލީފް ފަންޑު”ގެ ނަމުގައި މި ފަންޑް ފޮށި ހުޅުވުމަށް ރޭ ހދ. އަތޮޅު ތައުލީމީ މަރުކަޒުގައި ބޭއްވި ރަސްމިއްޔާތުގައި އެ ފަންޑް ފޮށި ހުޅުވައިދެއްވީ ސަބް އިންސްޕެކްޓަރ އޮފް ޕޮލިސް އިބްރާހީމް މުހައްމަދު އެވެ.

މި ފޮށި ބެހެއްޓިފައި ހުންނާނީ އޮގަސްޓް 15 ގެ ނިޔަލަށް ކުޅުދުއްފުށީ އައިލެންޑް ފްރީޒް ފިހާރައިގައި ކަމަށާއި އަދި ސްޓޭޑިއަމްގައި ފިތުރު އީދު ނަމާދު ކުރެވޭ ވަގުތު ވެސް މި ފޮށި ބެހެއްޓުމަށް ހަމަޖެހިފައި ވާކަމަށް ރެޑްކްރެސެންޓުން މައުލޫމާތު ދެއެވެ.

މިމަހުގެ 24 ވަނަދުވަހު ކުޅުދުއްފުށީ ނޫރު ޖަމިއްޔާގެ ފަރާތުންވެސް ވަނީ ޣައްޒާގެ ރައްޔިތުންނަށް އެހީވުމުގެ ގޮތުން ފަންޑު ފޮއްޓެއް ހުޅުވާފަ އެވެ.