ފަލަސްތީނާއެކު ހދ އަތޮޅުގެ ރައްޔިތުން ތިބިކަން ހާމަކޮށްދިނުމަށް އަތޮޅުގެ ހުރިހާ ރަށެއްގައި ހިނގާލުމެއް ބާއްވައިފި

ހަދީޖާ އާދަމް

އިޒްރޭލުން ފަލަސްތީނަށް ދެމުންގެންދާ އުދުވާނީ ހަމަލާތައް ކުށްވެރިކޮށް ފަލަސްތީނާއެކު ހދ އަތޮޅުގެ ރައްޔިތުން ތިބިކަން ހާމަކޮށްދިނުމަށް ބޮޑު ހިނގާލުމެއް ބާއްވައިފި އެވެ.

ހދ އަތޮޅު ކައުންސިލުން އިސްނަގައިގެން ކުރިއަށް ގެންދިޔަ މި ހިނގާލުން ހދ އަތޮޅުގެ 13 ރަށެއްގައި އެއް ވަގުތެއްގައި ކުރިޔަށް ގެންދިޔަ އެވެ.

ކުޅުދުއްފުށީގެ ބޮޑެތި ހުރިހާ މަގުތަކެއްގައި މި ހިނގާލުން ކުރިޔަށް ދިޔައިރު މި ހިނގާލުމުގައި ސަރުކާރުގެ އޮފީސްތަކާ އާންމު ޖަމިއްޔާތަކުގެ ގިނަ އަދަދެއްގެ ރައްޔިތުން ބައިވެރިވި އެވެ.

މި ހިނގާލުގައި “ކުޅުދުއްފުށި އޮންލައިން” އިން ވެސް ވަނީ ބައިވެރިވެފަ އެވެ.

މި ހިނގާލުން ނިންމާލާފައި ވަނީ ފަލަސްތީނުގެ ރައްޔިތުންނަށް ނަސްރު ދެއްވުމަށް ކުރެވުނު ހާއްސަ ދުއާ އަކުންނެވެ.

ހދ އަތޮޅުން ކައުންސިލުން އިސްނަގައިގެން ހދ އަތޮޅުގައި މީހުން ދިރިއުޅޭ ހުރިހާ ރަށެއްގައި ޣައްޒާއަށް އެހީވުމަށް ފަންޑު ފޮށިތަކެއް ވަނީ ބަހައްޓާފައެވެ.

އިޒްރޭލުން ފަލަސްތީނުގެ ގާޒާއަށް ހަމަލާދޭން ފެށިތާ 19 ދުވަސްވެފައިވާއިރު އިޒްރޭލުގެ ހަމަލާތަކުގައި ޝަހީދުވި ފަލަސްތީނު ރައްޔިތުންގެ އަދަދު ހާހަކަށްވުރެ މައްޗަށް ވަނީ އަރާފައެވެ.

އަދި އަނިޔާވި މީހުންގެ އަދަދު ވަނީ 5740 އަރާފައެވެ. ހަމައެކަނި ރޭ އިޒްރޭލުން ދިން ހަމަލާތަކުގައި އެކަނި ވެސް 20 މީހުން ޝަހީދުވެފައިވެއެވެ.