އާންމު ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް އަމަލުކުރަމުންދިޔަ މީހަކު ބާރަށުން ހައްޔަރުކޮށްފި

އާންމު ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް އަމަލުތައް ބަހައްޓަމުންދިޔަ މީހަކު ހއ. ބާރަށުން ހައްޔަރުކޮށްފި އެވެ.

މި މައްސަލައާ ގުޅިގެން ހައްޔަރުކޮށްފައިވަނީ 18 އަހަރުގެ ފިރިހެނެއް ކަމަށް ފުލުހުން މައުލޫމާތުދެ އެވެ.

ފުލުހުން މައުލޫމާތުދިން ގޮތުގައި އޭނާ ހައްޔަރުކޮށްފައިވަނީ ގޭގޭ ފުރާޅަށް ގައު އުކާ ރަށުގެ މަގުތަކުގައި ހުރި ބައްތިތަކަށް ގެއްލުންދީ ރައްޔިތުންގެ ހިތްތަކުގައި ބިރުވެރިކަން އުފެދޭގޮތަށް ފުޅި ގޮއްވާކަމުގެ ޝަކުވާތައް ލިބެމުންދިއުމާ ގުޅިގެން ކޯޓު އަމުރެއްގެ ދަށުން ޖުލައި މަހުގެ 23 ވަނަ ދުވަހުގެ މެންދުރުގެ ވަގުތެއްގަ ކަމަށެވެ.

ކޯޓު އަމުރެއްގެ ދަށުން އޭނާ ހައްޔަރުކޮށްފައިވަނީ ރަށުތެރޭގައި ފުޅި ގޮއްވުމުގައި ހަރަކާތްތެރިވަމުންދަނިކޮށް މަޑުކުރަން އެންގުމުން މަޑުނުކޮށް ފުލުހުންގެ އަމުރަށް ނުކިޔަމަންތެރިވެ ފިލައިގެން އުޅެނިކޮށް ކަމަށް ފުލުހުން ބުނެ އެވެ.

މި މައްސަލާގައި ހައްޔަރުކޮފައިވާ މީހާގެ ބަންދާމެދު ގޮތެއް ނިންމުމަށްޓަކައި ހއ. ދިއްދޫ މެޖިސްޓްރޭޓް ކޯޓަށް ހާޒިރުކުރުމުން 10 ދުވަހުގެ ބަންދުގެ މުއްދަތެއް ދީފައިވާއިރު މި މައްސަލަ ދަނީ ހއ. ބާރަށު ޕޮލިސް ސްޓޭޝަން އަދި ދިއްދޫ ޕޮލިސް ސޮޓޭޝަން ގުލިގެން އިތުރަށް ތަހުގީގު ކުރަމުންނެވެ.