ޕެރަ ބައިބަލާ ޗެލެންޖް ފަށައިފި

ޕެރަ ބައިބަލާ ޗެލެންޖް ފެށައިފި އެވެ.

އަމީރު އަމީން ސްކޫލާ ދިމާލު ހިއްކި ބިމުގައި ރޭ ފެށި ބައިބަލާ ޗެލެންޖްގައި ޖުމްލަ 3 މެޗު ރޭ ކުޅެފައިވެ އެވެ. އެގޮތުން ފުރަތަމަ މެޗުގައި ޖެމްރޮކް އަދި ނިއުއޭޖް ކުޅުނު މެޗު ސީދާ ދެ ގޭމުން ކާމިޔާބު ކޮށްފައިވަނީ ޖެމްރޮކުންނެވެ. ޖެމްރޮކުން ފުރަތަމަ ގޭމުގައި ކުޅެފައިވަނީ ބޭރުންނެވެ.

ދެވަނަ މެޗުގައި ދަލުބޭރުން އަދި މަންގަނޑު ކުޅުނުއިރު މި މެޗު ގަދަހިފުމަށް ގޮސްގެން ކާމިޔާބު ކުރީ ދަލުބޭރުންނެވެ. މި މެޗުގެ ފުރަތަމަ ގޭމުގައި ދަލުބޭރުން ބޭރު ގޭމް ކާމިޔާބުކުރިއިރު ދެވަނަ ގޭމުގައި އެތެރޭން ކުޅެވަނީ ބަލިވެފަ އެވެ. އެހެންކަމުން މެޗުގެ ނަތީޖާ ނެރެން ގަދަހިފުމަށް ގޮސް ގަދަ ހިފުމުގެ 2 ގޭމް ކާމިޔާބުކޮށްގެން ދަލުބޭރުން ވަނީ އެ ޓީމުގެ ފުރަތަމަ މެޗު ކާމިޔާބުކޮށްފަ އެވެ.

ރޭގެ ތިންވަނަ މެޗުގައި ކަންމަތި އަދި ނިއުއޭޖް ކުޅުނުއިރު މި މެޗު ކާމިޔާބުކުރީ ނިއުއޭޖުންނެވެ. މި މެޗުގެ ފުރަތަމަ ގޭމު ކަންމަތިންވަނީ އެތެރޭން ކުޅެ ފަސޭހަކަމާއެކު ކާމިޔާބުކޮށްފަ އެވެ. ނަމަވެސް ނިއުއޭޖުން ވަނީ ދެވަނަ ގޭމުގައި އެތެރޭން ކުޅެ އެ ގޭމް ކާމިޔާބުކޮށްފަ އެވެ. އެހެންކަމުން މި މެޗުގައިވެސް ނަތީޖާ ނެރެން ގަދަހިފުމަށް ގޮސްފައިވާއިރު ގަދަހިފުމުގެ 3 ގޭމުން 2 ގޭމް ނިއުއޭޖުން ކާމިޔާބުކޮށް ނިއުއޭޖުން ވަނީ އެ ޓީމުގެ ފުރަތަމަ މޮޅު ހޯދާފަ އެވެ.

މިފަހަރު ޖުމްލަ 5 ޓީމު ވާދަކުރާއިރު މިރޭ ވެސް ތިންމެޗު ކުޅުމަށްވަނީ ހަމަޖެހިފަ އެވެ. އެގޮތުން ފުރަތަމަ މެޗުގައި 2100 ގައި ޖެމްރޮކް އަދި މަންގަނޑު ކުޅޭއިރު ދެވަނަ މެޗުގައި ދަލުބޭރުން ބައްދަލު ކުރާނީ ކަންމަތި ޓީމާ އެވެ. އަދި މިރޭގެ ފަހު މެޗުގައި މަންގަނޑު ބައްދަލުކުރާނީ ނިއުއޭޖްއާ އެވެ.

ޕެރަ ބައިބަލާ ޗެލެންޖް ރޭ ހުޅުވާ ދެއްވުމުގެ ގޮތުން ޝަރަފުވެރި މެހެމާން ޖުމްހޫރީ ޕާޓީގެ ކައުންސިލް މެންބަރު އަލްފާޟިލް ނަސްރުﷲ އިސްމާއީލް ދެއްކެވި ވާހަކަފުޅުގައި ޖުމްހޫރީ ޕާޓީގެ ފަރާތުން ރަށުގެ ޒުވާނުންނަށް މިފަދަ ގިނަ ކަންތައްތަކެއް ކޮށްދެއްވާނެ ކަމަށް ވައުދުވެ ވަޑައިގެންނެވި އެވެ.

[yass cats=98]