ކޭ.އެލް ވޯލްޑްކަފް ފޯރީގެ އެންވަނަ މުހައްމަދު އަބޫބަކުރަށް ލިބިއްޖެ

“ކުޅުދުއްފުށީ ލައިވް”އިން ކުރިއަށް ގެންދިޔަ “ކޭ.އެލް ވޯލްޑްކަޕް ފޯރި” މުބާރާތުން އެންމެ ގިނަ ސްކޯރ ދިމާކޮށްގެން އެއް ވަނަ، ކުޅުދުއްފުށީ ގުލްތަރުޖަމާގެ، މުހައްމަދު އަބޫބަކުރު ހޯދައިފި އެވެ.

މިދިޔަ މަހު ނިމުނު ފީފާ ވޯލްޑް ކަޕް 2014 ގެ މެޗްތަކުގެ ސްކޯރ ދިމާކުރުމުގެ މި މުބާރާތުގެ ނަތީޖާ ފާޅުކޮށް އިނާމު ދިނުމަށް ރޭ ކުޅުދުއްފުށީ އޮންރެންޖު ގާރޑަންގައި ބޭއްވި ހަފުލާގައި މުހައްމަދު އަބޫބަކުރަށް ފައިސާގެ އިނާމު ހަވާލުކޮށްދެއްވީ މި މުބާރާތުގެ ސްޕޮންސަރުންކަމަށްވާ ސޭމް ސްޕޯޓްސް، ޕެންޓަގްރާމް، އަދި އާޕޮއިންޓްގެ ވެރިންނެވެ.

މި މުބާރާތުގެ އެއްވަނަ އަށް ހުށަހެޅިފައިވަނީ ހުށަހެޅިފައިވާ 5000ރ. ގެ ފައިސާގެ އިނާމެކެވެ.

މި މުބާރާތުގައި މުހައްމަދު އަބޫބަކުރުވަނީ 388 ޕޮއިންޓް ހޯދާފަ އެވެ. އޭނާއާ އެންމެ ގާތުން ވާދަކުރި ފަރާތަށް ލިބިފައިވަނީ 374 ޕޮއިންޓް ކަމަށް ކޭއެލްއިން މައުލޫމާތުދެ އެވެ. އަދި މިމުބާރާތުގައި 297 ފަރާތަކުން ބައިވެރިވެފައިވާ ކަމަށް އެފަރާތުން މައުލޫމާތު ދިނެވެ.

ކުޅުދުއްފުށީ ލައިވްގައި ރެޖިސްޓްރީކޮށްގެން ނުވަތަ ބައިވެރިވާ ފަރާތުގެ ފޭސްބުކް އައިޑީން ކުޅުދުއްފުށީ ލައިވްއަށް ލޮގިން ވެގެން ބައިވެރިވެވޭގޮތަށް ކުރިއަށް ގެންދިޔަ މި މުބާރާތަށް ބޮޑު ތަރުހީބެއް ލިބިފައިވާކަން އެފަރާތުން ފާހަގަކުރެ އެވެ.

ރޭގެ ހަފްލާގައި، ކުޅުދުއްފުށީ ލައިވް ޓީމުގެ ބައެއް މެންބަރުންނާއި، މުބާރާތުގެ ސްޕޮންސަރުން ބައިވެރިވެފައިވެ އެވެ.

ކުޅުދުއްފުށި ލައިވް އަކީ ރަޖިސްޓްރީކޮށްގެން ހިންގާ އޮންލައިން ނޫހެކެވެ.