ޕެރަ ބައިބަލާ ޗެލެންޖަށް ކައުންސިލުން ވެދެއްވި އެހީ ފާހަގަކޮށްފައި ނުވާތީ އެކަމާ ހިތާމަކުރަން: ކައުންސިލް

ނިމިގެން ދިޔަ “ޕެރަ ބައިބަލާ ޗެލެންޖް” ގައި އެ މުބާރާތް ބޭއްވުމަށް ކައުންސިލް އިދާރާއިން ވެދެއްވި އެހީ ފާހަގަ ކޮށްފައި ނުވާތީ އެކަމާ ހިތާމަ ފާޅުކޮށް ކައުންސިލުން ނޫސްބަޔާނެއް ނެރެފި އެވެ.

އިއްޔެ ކުޅުދުއްފުށީ ކައުންސިލުން ނެރުނު ނޫސްބަޔާނުގައި ބުނެފައިވަނީ މިއަހަރު ފިތުރު އީދު ފާހަގަ ކުރުމުގެ ގޮތުން ކުޅުދުއްފުށީގައި ބޭއްވުނު ބައިބަލާ މުބާރާތަށް މިޝްގާލް ބޮޑުބެރު ގުރޫޕުން ކައުންސިލުގެ އެހީތެރިކަމަށް އެދުމުން ކައުންސިލްގެ ތަނަވަސްކަން ހުރިވަރަކުން މިޝްގާލް ބޮޑުބެރު ގްރޫޕަށް އެހީ ފޯރުކޮށްދީފައިވާ ކަމަށާއި ފައިސާގެ އިތުރުން ބައެއްތަކެތިވެސް ފޯރުކޮށްދީފައިވާނެކަމަށް ނޫސްބަޔާނުގައި ވެއެވެ.

އެހެންނަމަވެސް މުބާރާތް ނިމުނު އިރުވެސް ކައުންސިލުން ވެދެއްވި އެހީ އެއްވެސް ވަރަކަށް ފާހަގަ ކޮށްފައިނުވާތީ އެކަމާ ހިތާމަ ފާޅު ކުރާކަމަށް ކައުންސިލުގެ ނޫސްބަޔާނުގައި ބުނެފައި ވެއެވެ.

ކައުންސިލުން ބުނީ ޒުވާނުން އިސްނަގައިގެން ރަށު ފެންވަރުގައި ކުރިއަށް ގެންދާ އިޖްތިމާއީ އެކިއެކި ހަރަކާތްތައް ދިރުވައި އެހީތެރިކަމަށް އެދިއްޖެނަމަ އެބަޔަކަށް އެހީވުމަކީ މިހާރުވެސް ކައުންސިލުން ވަރަށް ބޮޑަށް އިސްކަމެއްދޭ ކަމެއް ކަމަށެވެ.