ގްރީން ޓެކްސީ ސެންޓަރުގެ ހިދުމަތް 24 ގަޑިއިރު ދޭން ފަށައިފި

ކުޅުދުއްފުށީގައި ޓެކްސީގެ ހިދުމަތް ދެމުން އަންނަ ގްރީން ޓެކްސީ ސެންޓަރުގެ ހިދުމަތް 24 ގަޑި އިރަށް ބަދަލުކޮށް ހިދުމަތްދޭން ފަށައިފި އެވެ.

ގްރީން ޓެކްސީ ސާރވިސް އިން ނެރެފައިވާ ބަޔާނެއްގައި ވަނީ ގްރީން ޓެކްސީ ސާރވިސްގެ ކޯލްސެންޓަރެއް މި މަހުގެ އެއްވަނަ ދުވަހު ރަސްމީކޮށް ހުޅުވިފައިވާކަމަށެވެ. އަދި ޓެކްސީގެ ހިދުމަތް އިތުރަށް ފުޅާކުރުމަށްޓަކައި 24 ގަޑިއިރު ލިބޭ ޓެކްސީގެ ހިދުމަތަކަށް ބަދަލުކޮށްފަ ކަމަށެވެ.

އެ ބަޔާނުގައި ގްރީން ޓެކްސީގެ އަމާޒަކީ ޓެކްސީއެއް ހޯދުމަށްޓަކައި ކޯލްސެންޓަރަށް ގުޅުއްވާތާ ލަސްވެގެން ފަސް މިނެޓް ތެރޭގައި ކުޅުދުއްފުށީގެ ކޮންމެ ތަނަކަށް ކޮންމެ ވަގުތެއްގައިވެސް ހިދުމަތް ފޯރުކޮށްދެވޭވަރަށް ޓެކްސީގެ ހިދުމަތް ތަރައްގީ ކުރުން ކަމަށް ފާހަގަކޮށްފައިވެ އެވެ.

ކޯލް ސެންޓަރުގައި 24 ގަޑިއިރު ކަސްޓަމަރުންގެ ހިދުމަތުގައި މުވައްޒަފުން ތިބޭނެކަމަށްވެސް އެ ބަޔާނުގައިވެ އެވެ. އަދި 6527117 އަށް ގުޅުއްވުމުން ޓެކްސީގެ ހިދުމަތް ފަސޭހަކަމާއި އަވަހަށް ލިބޭނެ ކަމަށްވެސް ބަޔާނުގައިވެ އެވެ.

ގްރީން ޓެކްސީ ސާރވިސް އަކީ 1 ފެބްރުއަރީ 2011 ރަޖިސްޓްރީ ކުރެވިގެން ކުޅުދުއްފުށީގައި ޓެކްސީގެ ހިދުމަތް ދެމުން އަންނަ ޓެކްސީ ސެންޓަރެކެވެ.