ކޮންމެ ތަނެއްގައިވެސް އުރީދޫގެ ވައި-ފައި

އުރީދޫ މޯލްޑިވްސްއިން ކޮންމެ ތަނެއްވެސް ވައިފައި ހޮޓް ސްޕޮޓަކަށް ބަދަލުކޮށްލެވޭ ވައިފައި ޑިވައިސްތަކެއް ތައާރަފްކޮށްފި އެވެ.

އުރީދޫއިން އިއްޔެ ބޭއްވި ނިއުސް ކޮންފަރެންސެއްގައި މި ޑިވައިސް ތައާރަފް ކޮށްދެއްވަމުން އުރީދޫ އިން މައުލޫމާތު ދިން ގޮތުގައި ކެފޭ، ބީޗް ނޫނީ ފެރީއެއް ވިޔަސް މިހާރު ވައިފައި މެދުވެރިކޮށް އެއްފަހަރާ ގިނަ ޑިވައިސްތަކެއްގައި ރާއްޖޭގެ އެންމެ ފުރިހަމަ ނެޓްވޯކްގެ އެންމެ ހަލުވި ސްޕީޑާއި ކަނެކްޝަން ބޭނުންކުރެވޭނެ ކަމަށެވެ.

އަޅުގަނޑުމެން މެދުކެނޑުމެއްނެތި މިމަސައްކަތް ކުރަނީ ކަސްޓަމަރުންނަށް އެންމެ ފަހުގެ ޒަމާނީ ޓެކްނޮލޮޖީގެ ފުރިހަމަ ހިދުމަތްތައް ސްމާޓްފޯނުތަކަށް އެންމެ ފުރިހަމަ ނެޓްވޯކުގައި ބޭނުންކުރަން ގެނެސްދޭން. އަޅުގަނޑުމެން މެދުކެނޑުމެއްނެތި ނެޓްވޯކް ފުރިހަމަ ކުރުމުގެ މަސައްކަތް ކުރަމުންދާއިރު، އެންމެ ފަހުގެ ޒަމާނީ ހިދުމަތްތައް ގެނެސްދޭނަން، އަދި މިއަދު މިތައާރަފްކުރެވުނު ޑިވައިސްތަކަކީވެސް ކަސްޓަމަރުން އިންޓަނެޓް ހޯދަން މަސައްކަތްކުރާގޮތް ބަދަލު ކުރުވާނެ ފަދަ ޑިވައިސްތަކެއް” އުރީދޫ ކޮމާޝަން ޑިރެކްޓަރ އެސް.ޕީ.ސަރަތީ ވިދާޅުވި އެވެ.

މި ހިދުމަތް ދިނުމަށް ތިން ޑިވައިސް އެއް ބޭނުންކުރާއިރު ކޮންމެ ޑިވައިސްއެއް ވެސް ބޭނުންކުރެވޭނީ އުރީދޫގެ ސިމްކާޑަކާ އެކު އެވެ.

އެގޮތުން ބެޓަރި ރީޗާޖް ކުރެވޭ އުރީދޫ މައިފައި ޑިވައިސްއަކީ ކޮންމެ ތަނެއްވެސް ވައިފައި ހޮޓްސްޕޮޓަކަށް ބަދަލުކޮށްލެވޭ ޖީބަށް ލެވޭވަރުގެ ކުޑަ ޑިވައިސް އެކެވެ. އަދި މި ޑިވައިސް މެދުވެރިކޮށް އެއްފަހަރާ 10 ޑިވައިސްއަށް އުރީދޫ ތްރީޖީ ޕްލަސް އަދި ފޯޖީ ނެޓްވޯކް ފަސޭހަކަމާއެކު ބޭނުންކުރެވޭނެ ކަމަށް އުރީދޫ އިން މައުލޫމާތު ދިނެވެ. މި ޑިވައިސްގެ އަގަކީ 850 ރުފިޔާ އެވެ.

އުރީދޫ ވައި-ފައި ޑިވައިސްއަކީ ފަސޭހަކަމާއެކު ކަރަންޓު ސޮކެޓް ނޫނީ ޔޫއެސްބީ ޕޯޓަކަށް ޖެހުމުން ވަގުތުން ވައި-ފައި ހޮޓްސްޕޮޓަކަށް އެތަނެއް ބަދަލުވެގެންދާ ވައި-ފައި މެދުވެރިކޮށް 10 ޑިވައިސްއަށް އެއްފަހަރާ ކަނެކްޓް ކުރެވޭނެ ޑިވައިސްއެއްކަމަށް އުރީދޫއިން މައުލޫމާތުދެ އެވެ. އުރީދޫ ތްރީޖީ ޕްލަސް އަދި ފޯޖީ ނެޓްވޯކް ފަސޭހަކަމާއިއެކު ބޭނުންކުރެވޭއިރު މި ޑިވައިސްގެ އަގަކީ 1599 ރުފިޔާ އެވެ.

އުރީދޫ ރައުޓާއެއް ބޭނުންކޮށްގެން އޮފީސް އަދި ގޭތެރެ ވައިފައި ޒޯނަކަށް ބަދަލުކޮށްލެވެ އެވެ. އެ ރައުޓަރު މެދުވެރިކޮށް އެއްފަހަރާ 32 ޑިވައިސް އަށް އުރީދޫ ތްރީޖީ އަދި ސުޕަ ފާސްޓް ފޯޖީ، 100 އެމްބީޕީއެސް ސްޕީޑުގައި ބޭނުންކުރެވެ އެވެ. އެ ރައުޓަރު އުރީދޫ ޖަމްބޯ ޑޭޓާ ޕްލޭންސްއާ އެކު ހިލޭ ލިބޭނެކަމަށް އުރީދޫއިން މައުލޫމާތުދެ އެވެ.

މި އައު ޑިވައިސްތައް ރާއްޖޭގެ އެކިކަންކޮޅުތަކުގައި ހުރި އުރީދޫ އެކްސްޕީރިއަންސް ސެންޓަރތަކުން ލިބެން ހުންނާނެކަމަށް އުރީދޫއިން ބުނެ އެވެ.