ހަލުވިކަމާއެކު ފެތުރެމުން އަންނަ އެބޯލާ ވައިރަސް ކޮންޓްރޯލް ނުކުރެވޭ ހިސާބަށް!

ދުނިޔޭގައި ހަލުވިކަމާއެކު ފެތުރެމުން އަންނަ ނުރައްކާތެރި އެބޯލާ ވައިރަސް ކޮންޓްރޯލްނުކުރެވޭ ވަރަށް ފެތުރެމުން އަންނަކަމަށް ވޯލްޑް ހެލްތް އޮގަނައިޒޭޝަން (ޑަބްލިއުއެޗްއޯ) އިން ބުނެފި އެވެ.

ޑަބްލިއުއެޗްއޯގެ ހެޑް މަރްގަރެޓް ޗަން ވިދާޅުވީ ހުޅަނގު އެފްރިކާގައި މި ވައިރަސް އިންތިހާއަށް ފެތުރިފައިވާ ކަމަށެވެ. އަދި މިކަމުގެ ސަބަބުން އެތައް ބައެއްގެ ފުރާނަ ގެއްލެމުންދާ ކަމަށެވެ.

އަވަހަށް ފަރުވާ ދެވިއްޖެނަމަ މި ވައިރަހުން ސަލާމަތްވުމުގެ ފުރުސަތު އޮންނައިރު މި ވައިރަހުގެ ސަބަބުން އެތެރެ ހަށިން ލޭއައިސް ގުނަވަންތައް މަސައްކަތްކުރުން ހުއްޓެ އެވެ.

މިބަލީގެ ވައިރަސް މީހެއްގެ ގަޔަށް ވާސިލުވާތާ ދެ ދުވަހާއި 21 ދުވަހާއި ދެމެދުގެ މުއްދަތެއްގެ ތެރޭގައި ބަލީގެ އަލާމާތްތައް ފެންނާނެ ކަމުގައި ޑަބްލިއުއެޗްއޯ އިން މައުލޫމާތުދެ އެވެ. މިބަލީގެ ފުރަތަމަ އަލާމާތްތަކުގެ ތެރޭގައި ހުން އައުން، ގައިގައި ރިއްސުން، ވަރުދެރަވުން، ބޮލުގައި ރިއްސުން، މޭނުބައި ކުރުން އަދި ކަރުގައި ރިއްސުން ހިމެނެ އެވެ.

ހުޅަނގު އެފްރިކާގެ ގައުމުތަކުގައި މިހާރު ހަލުވިކަމާއެކު ފެތުރެމުންދާ އެބޯލާ ވައިރަހުން ރައްކާތެރިވެ ތިބުމަށް ރާއްޖޭގެ ސިއްހަތާބެހޭ ވުޒާރާއިން ވެސް ވަނީ އިލްތިމާސްކޮށްފަ އެވެ.

މިދިޔަ ހޯމަ ދުވަހު ސިއްހަތާބެހޭ ވުޒާރާއިން ނެރުނު ނޫސްބަޔާނެއްގައި ބުނެފައިވާ ގޮތުގައި އެބޯލާ ހުމުގެ ރޯގާގެ ބަލިތައް އެފްރިކާގެ ގައުމުތަކުން ފެންނަމުންދާތާ އަހަރުތަކެއް ވެފައިވާ ކަމަށާއި ނަމަވެސް މިހާރު މިރޯގާ އެއްގައުމުން އަނެއް ގައުމަށް ފެތުރިފައިވުމާއެކު މިބައްޔަށް ދޭންޖެހޭ ސަމާލުކަން މިއަދު ބޮޑުވެފައިވާ ކަމަށެވެ.

މިހާރު ފެތުރެމުންދާ ރޯގާ ކޮންޓްރޯލް ކުރުމުގެ ގޮތުން ޑަބްލިއުއެޗްއޯ އިން ގިނަ މަސައްކަތްތަކެއް ކުރަމުންދާ ކަމަށާއި މިބަލި ފެތުރެމުންދާ އެއްވެސް ގައުމަކަށް ދަތުރުފަތުރު ނުކުރުމަށް ޑަބްލިއުއެޗްއޯ އިން އަންގާފައިނުވި ނަމަވެސް މިގައުމުތަކަށް މިދުވަސްވަރު ދަތުރުކުރުމަކީ ސިއްހީ ގޮތުން ރައްކާތެރިކަމެއް ނޫން ކަމުގައި މިނިސްޓްރީން ބުނެފައިވެ އެވެ.

އެފްރިކާގައި ފެތުރެމުންދާ އެބޯލާގެ ސަބަބުން ގިނީ އަށް ދަތުރުކުރުން އެމިރޭޓްސްއިންވެސް ވަނީ ވަގުތީ ގޮތުން ހުއްޓާލާފަ އެވެ.

އެފްރިކާގެ ލައިބީރިޔާގައި ވައިރަސްގެ އަސަރުކޮށްފައިވާ ސަރަހައްދުގައި މަސައްކަތްކުރަމުންދަނިކޮށް ޔޫއެސްގެ ރިލީފް އެޖެންސީގެ ދެ ޑޮކްޓަރަކަށްވެސް ވަނީ އެބޯލާ ވައިރަސް ޖެހިފަ އެވެ.

ހުޅަނގު އެފްރިކާގެ ގައުމުތަކުގައި އެބޯލާ ވައިރަސް ފެތުރެމުންދާއިރު ސިއްހީ ދާއިރާގެ ތަޖުރިބާކާރު 50 އޮފިޝަލުން އެސަރަހައްދަށް ފޮނުވުމަށް ނިންމާފައިވާ ކަމަށް އެމެރިކާއިން ވަނީ ބުނެފަ އެވެ.

އެމެރިކާގެ ސިއްހަތާބެހޭ އިދާރާގެ އޮފިޝަލަކު ވިދާޅުވީ އެބޯލާ ވައިރަސް ފެތުރެމުންދަނީ ކަންބޮޑުވާ ދަރަޖައެއްގައި ކަމަށާއި އެކަން ހުއްޓުވަން މަސައްކަތްތަކެއް ކުރަންޖެހިފައިވާ ކަމަށެވެ.

ބަރަކް އޮބާމާވެސް ވަނީ ވޮޝިންޓަނުގައި އަންނަ ހަފުތާ ބޭއްވުމަށް ހަމަޖެހިފައިވާ ޔޫއެސް އެފްރިކާ ކޮންފަރެންސުގައި ބައިވެރިވާ އެބޯލާ ވައިރަހުގެ އަސަރުކޮށްފައިވާ ގައުމުތަކުގެ މީހުން ސްކްރީން ކުރައްވާނެކަމަށް ގޮވާލާފަ އެވެ.

1976 ގައި ދެނެގަނެވުނު އެބޯލާ ވައިރަސް ހުއްޓުވުމަށްޓަކައި ދުނިޔޭގެ ސިއްހަތު ޖަމިއްޔާއިން ވަނީ 100 މިލިއަން ޑޮލަރުގެ ޕްލޭނެއް އިއުލާނުކޮށް އެ ޕްލޭނުގެ ދަށުން ވައިރަހުގެ އަސަރުކޮށްފައިވާ ގައުމުތަކުގައި ހަރަކާތްތެރިވާނެ އެތައް ސަތޭކަ ހެލްތް ކެއަރ ވޯކާސްއަށް ފަންޑްކުރުމަށްވެސް ނިންމާފަ އެވެ.

އެންމެ ބޮޑަށް މި ވައިރަހުގެ އަސަރު ކޮށްފައިވާ ލައިބީރިއާ، ގިނީ އަދި ސިއެރާލިއޯ ގައި މި ވައިރަހުގެ ސަބަބުން މިހާތަނަށް 1500 މީހުނަށްވުރެ ގިނަ މީހުންނަށް ބަލިޖެހި މީގެ ތެރެއިން 672 މީހުން މަރުވެފައިވާ ކަމަށް ޑަބްލިއުއެޗްއޯ އިން ހާމަކުރެ އެވެ.

މިބައްޔަކީ ބަލިޖެހިފައިވާ މީހެއް ނުވަތަ ޖަނަވާރެއްގެ ލޭ ނުވަތަ ހަށިގަނޑުގައި އުފެދޭ ދިޔައެއްގެ ސަބަބުން ނުވަތަ ބަލި ޖެހިފައިވާ މީހަކު ބޭނުންކޮށްފައިވާ ތޫނު އެއްޗެހި (އިންޖެކްޝަން ކަށި ފަދަ ތަކެތި) ގެ ޒަރީއާއިން އެކަކު ގައިން އަނެކަކުގެ ގަޔަށް ފަސޭހަކަމާއެކު އަރާ ބައްޔެކެވެ.

އޭގެ އިތުރުން ވައިގެ ޒަރީއާއިން މި ވައިރަސް ފެތުރުމުގެ ފުރުސަތުއެބައޮތް ކަމަށްވެސް ޑަބްލިއުއެޗްއޯ އިން ހާމަކުރެ އެވެ.

އެބޯލާއާ ގުޅޭގޮތުން މަޝްވަރާ ބައްދަލުވުންތަކެއް ސުވިޓްޒަލޭންޑްގެ ޖެނީވާގައި ކުރިއަށްދާއިރު މަޝްވަރާތަކަށް ފަހު އެބައްޔަކީ ދުނިޔޭގެ ފެންވަރުގައި ކުއްލި ހާލަތަށް ގެނެސް ފިޔަވަޅު އަޅަންޖެހިފައިވާ މައްސަލައެއްތޯ ނިންމާނެ އެވެ.