ކުޅުދުއްފުށީ ސްކޫލުތަކުގައި ބެހެއްޓި ޣައްޒާ ފަންޑް ފޮށިތަކަށް ބައިލައްކައަށް ވުރެ ގިނަ ރުފިޔާ ލިބިއްޖެ

ކުޅުދުއްފުށީގެ 3 ސްކޫލެއްގައި ބެހެއްޓި ޣައްޒާ ފަންޑް ފޮށިތަކަށް ބައިލައްކަ އަށް ވުރެ ގިނަ ރުފިޔާ ލިބިއްޖެ އެވެ.

ޖަލާލުއްދީން ސްކޫލް، އަފީފުއްދީން ސްކޫލް އަދި ހދ އޭއީސީގައި ބެހެއްޓި ފަންޑް ފޮށިތަކަށް ޖުމްލަ 58528ރ. 25 ލާރި އާއި 42 ޔޫއެސް ޑޮލަރު އަދި 1 އިންޑިޔަން ރުޕީސް ލިބިފަ އެވެ.

މި ތިން ސްކޫލުގައި ބެހެއްޓި ފަންޑު ފޮށިތަކުގެ ތެރެއިން އެންމެ ގިނައިން ލިބިފައިވަނީ ހދ އަތޮޅު ތައުލީމީ މަރުކަޒު (އޭއީސީ) ގައި ބެހެއްޓި ފަންޑު ފޮށްޓަށެވެ. އެގޮތުން ހދ. އޭއީސީގައި ބެހެއްޓި ފަންޑް ފޮއްޓަށް 25606ރ. 62 ލާރި ލިބިފައިވާކަމަށް އެ ސްކޫލުން މައުލޫމާތު ދެއެވެ.

އަފީފުއްދީން ސްކޫލުގައި ބެހެއްޓި ފަންޑް ފޮއްޓަށް 16569ރ. 13 ލާރީގެ އިތުރުން 21 ޔޫއެސް ޑޮލަރާއި 1 އިންޑިއަން ރުޕީސް ލިބުނުކަމަށް އެ ސްކޫލުން މައުލޫމާތުދެ އެވެ.

އަދި ޖަލާލުއްދީން ސްކޫލުގައި ބެހެއްޓި ފަންޑް ފޮއްޓަށް ވަނީ 16352ރ. 50 ލާރީގެ އިތުރުން 21 ޔޫއެސް ޑޮލަރު ލިބިފައިވާކަމަށް އެ ސްކޫލުން މައުލޫމާތު ދެއެވެ.

އިއްޔެ މެންދުރުފަހު ދެއަކުން ހަޔަކަށް ކުރިއަށް ގެންދިޔަ ފަންޑް ހޯދުމުގެ މި ހަރަކާތުގައި 3 ސްކޫލުގެ ދަރިވަރުންނާއި ބެލެނިވެރިން އަދި މުވައްޒަފުން ވަނީ ބައިވެރިވެފަ އެވެ.