ކުޅުދުއްފުއްޓަށް މަސްތުވާތަކެތި އެތެރެކުރާ މަސްތުވާތަކެތީގެ ބޮޑެއްގެ ބަންދުގެ މުއްދަތު 5 ވަނަ ފަހަރަށް އިތުރުކޮށްފި

ކުޅުދުއްފުށްޓަށް ފުޅާދާއިރާއެއްގައި މަސްތުވާތަކެތި އެތެރެކޮށް އެތަކެތި ވިއްކާ ކަމުގެ ތުހުމަތުގައި ފުލުހުން އަތުލައިގަތް ހދ.ކުޅުދުއްފުށީ އަބަދަށްހިޔާގެ، އަބުދުލް ހަމީދު(39)ގެ ބަންދުގެ މުއްދަތު ކުޅުދުއްފުށީ ކޯޓުން ފަސްވަނަ ފަހަރަށް އިތުރުކޮށްދީފި އެވެ.

މިނިސްޓްރީ އޮފް ހޯމް އެފެއާޒުން ކަނޑައަޅާތަނެއްގައި ބަންދުގައި ބަހައްޓައިގެން ތަހުގީގު ކުރިއަށް ގެންދިއުމަށް މިހިނގާ އޯގަސްޓް މަހުގެ 8 ވަނަ ދުވަހު ކުޅުދުއްފުށި މެޖިސްޓްރޭޓް ކޯޓުން ވަނީ އިތުރު 8 ދުވަހުގެ ބަންދުގެ މުއްދަތެއް ދީފަ ކަމަށް ފުލުހުން ބުނެ އެވެ.

ކުޅުދުއްފުށިން އޭނާ ހައްޔަރުކުރީ، އޭނާ ކުޅުދުއްފުށްޓަށް މަސްތުވާތަކެތި އެތެރެކޮށް، ފުޅާ ދާއިރާއެއްގައި އެތަކެތީގެ ވިޔަފާރިކުރަމުންދާކަމަށް، އަޕަރ ނޯތު ޕޮލިސް ޑިވިޝަންގައި ހަރަކާތްތެރިވާ ފުލުހުންގެ އިންޓެލިޖެންސް ސެލް އަށް ލިބުނު މައުލޫމާތަކާ ގުޅިގެން، ކުޅުދުއްފުށި ޕޮލިސް ސްޓޭޝަނާއި އިންޓެލިޖެންސް ގުޅިގެން ހިންގި އޮޕަރޭޝަނެއްގަ ކަމަށްވެސް ފުލުހުން މައުލޫމާތުދެ އެވެ.

ފުލުހުން މައުލޫމާތުދޭ ގޮތުގައި ޖޫން 27 ވަނަ ދުވަހުގެ ހެނދުނު ކުޅުދުއްފުށްޓަށް ދިޔަ މާލެ ދަތުރުކުރާ ބޯޓަކުން ގެންދިޔަ ފޮށިގަނޑަކާ އޭނާހަވާލު ވުމުން، އޭނާއާއި އެ ފޮށިގަނޑު ފުލުހުންގެ ބެލުމުގެ ދަށަށް ގެނެސް ބަލައި ފާސްކުރި އިރު މަސްތުވާތަކެތި ކަމަށް ބެލެވޭ އެއްޗެއް ހުރި 3 ރަބަރު ޕެކެޓާއި ބާޒާރު ކޮތަޅެއްގެ އިތުރުން މަސްތުވާތަކެތި ބަންދުކުރަން ބޭނުންކުރާ ޒާތުގެ ގިނަ އަދަދެއްގެ ކުދި ޕެކެޓް ތަކެއް ފެނިފައިވެ އެވެ.

އޭނާ ފުލުހުންގެ ބެލުމުގެ ދަށަށް ގެނެސް، އޭނާގެ ކުޑަކަމުދާތަކެތި ތަހުލީލު ކުރިއިރު މަސްތުވާތަކެތީގެ ބާވަތަކަށް ވަނީ ޕޮޒިޓިވް ވެފައިވާ ކަމަށްވެސް ފުލުހުން ބުނެ އެވެ.

މީގެ ކުރިން މުއްދަތު އިތުރުކޮށްފައިވަނީ 2014 ޖޫން 27 ވަނަ ދުވަހުގެ 10 ދުވަސް، 2014 ޖުލައި 7 ވަނަ ދުވަހު 15 ދުވަސް، 2014 ޖުލައި 22 ވަނަ ދުވަހު 10 ދުވަސް އަދި 2014 އޯގަސްޓް 1 ވަނަ ދުވަހު 7 ދުވަހެވެ.

މި މައްސަލަ އަންނަނީ ކުޅުދުއްފުށީ ޕޮލިސްޓޭޝަންއިން އިތުރަށް ތަހްގީގު ކުރަމުންނެވެ.