ދިރާގު ރޯދަ ހަދިޔާގެ ގޮތުގައި މިފަހަރު ތަފާތު އިނާމުތަކެއް

ކޮންމެ ރަމަޟާންމަހަކު ދިރާގުން ދަނީ ރަމަޟާން މަހަށް ޚާއްސަކޮށްގެން ދިރާގު ބޮޑުހަދިޔާގެ ނަމުގައި އިނާމު ލިބުމުގެ ފުރުސަތުތަކަކާއި ޕްރޮމޯޝަންތަކެއް ހުޅުވާލަމުންނެވެ. ނަމަވެސް އެހެން އަހަރުތަކާ ހިލާފަށް މި އަހަރުގެ ރޯދަ މަހު ވީހާ ގިނަ ކަސްޓަމަރުންނަށް އަގުހުރި ހަދިޔާތަކެއް ދިނުމުގެ މަޤުޞަދުގައި ދިރާގުން ދެބަޔަކަށް ބަހާލައިގެން “ދިރާގު ރޯދަ ބޮޑު ހަދިޔާ” އަދި ހަފުތާއަކު އެއްފަހަރު އިނާމު ލިބޭ ހަފުތާގެ ބޮޑު ހަދިޔާ ޕްރޮމޯޝަނެއް ދިރާގުން ވަނީ ކުރިއަށް ގެންގޮސްފަ އެވެ.

ދިރާގު އެސިސްޓަންޓް މެނޭޖަރ ޕަބްލިކް ރިލޭޝަންސް އިމްޖާދް ޖަލީލް ވިދާޅުވީ މި އަހަރު އެފަރާތުން ބެލީ އެހެން އަހަރުތަކާ ތަފާތުކޮށް ނަމަވެސް ކަސްޓަމަރުން އެންމެ ބޭނުންޕެޅުވާނެ ގޮތަށް ޕްރޮމޯޝަންތަކެއް ބައްޓަންކޮށްގެން ކުރިއަށް ގެންދެވޭތޯ ކަމަށާއި އިނާމުތައް ކަނޑައަޅާފައިވާނީ އެކި އުމުރުފެރައިގެ ކަސްޓަމަރުންގެ މައްޗަށް އެކުލެވޭ ތަފާތު ފޯކަސް ގްރޫޕްތައް އެކުލަވާލައި އެ ގްރޫޕްތަކުން ހުށަހަޅާފައިވާ ޚިޔާލުހޯދާ، ގިނަ ދިރާސާތަކެއް ކުރުމަށް ފަހުކަމަށް ވެސް ވިދާޅުވިއެވެ. އީވޯ ހޯމްއާއި އެލިއާ އިންވެސްޓްމެންޓާއި އެކު ޕާޓްނަރޝިޕް ހަދައިގެން ކުރިއަށްގެންދިޔަ މި ޕްރޮމޯޝަން ގައި ދިރާގު ކަސްޓަމަރުންގެ ތެރޭން ހޮވޭ ނަސީބު ވެރި ފަރާތަކަށް ކޮންމެ ހަފްތާއަކު ޔަމަހާ ބްރޭންޑުގެ ސައިކަލެއް އަދި މުޅި މަސްނިމުމުން ތިން (3) ކޮޓަރީގެ ފްލެޓެއް މުޅިން އައު ކޮށްލުމުގެ ފުރުސަތު ލިބިގެން ދާނެއެވެ.

ފަސްލައްކަ ނުވަތަ ބައި މިލިއަން ރުފިޔާގެ ދިރާގު ރޯދަ އެންމެ ބޮޑު ހަދިޔާގެ ގޮތުގައި ހުށައަޅާފައިވަނީ އީވޯހޯމްގެ ފަރާތުންނެވެ. އިނާމު ލިބިވަޑައިންނަވާ ބޭފުޅަކަށް ތިން (3) ކޮޓަރީގެ ފްލެޓެއް މުޅިން އައު ކޮށްލުމުގެ ފުރުސަތު ލިބިގެން ދާނެވެ. ކޮޓަރި އަދި ސިޓިންރޫމްއަށް ބޭނުންވާނެ ހުރިހާ ފަރުނީޗާރުގެ އިތުރުން ތިން ފާހާނައިގައި ވާ ހުރިހާ އާލާއިތަކެއް އައުކުރުމާއި، ޓީވީ ސިސްޓަމާއި ސައުންޑް ސިސްޓަމް އަދި ބަދިގެއެއް ޑިޒައިންކޮށް ޔޫރަޕުން ފަރުމާކޮށްގެން ގެންސްދިނުން ހިމެނެއެވެ. އީވޯ ހޯމްގެ ފަރާތުން ފޯރުކޮށްދޭ އިނާމު ތަކަކީ މުޅިންވެސް ޔޫރަޕްގެ އެންމެ މަޝްހޫރު ބްރޭންޑުތަކުގެ ޕްރޮޑަކްޓު ތަކެވެ.

‘ދިރާގު ހަފްތާގެ ރޯދަބޮޑު ހަދިޔާ’ ގެ މިއަހަރުގެ ޕާޓްނަރަކީ އެލިޔާ އިންވެސްޓްމަންޓް ޕްރިވެޓް ލިމިޓަޑެވެ. ކޮންމެ ހަފަތާއަކު ހުރިހާ ދިރާގު ޕޯސްޓްޕެއިޑް ކަސްޓަމަރުންގެ ތެރޭން ހޮވޭ ނަސީބުވެރި ކަސްޓަމަރަކަށް، އެބޭފުޅަކު ބޭނުންވާ ޔަމަހާ ބްރޭންޑުގެ ސައިކަލެއް ދިނުމަށް ވަނީ ހަމަ ޖެހިފައެވެ. ޔަމަހާ ޒިއޮން، ޔަމަހާ ފީނޯ، ޔަމަހާ ޖުޕިޓަރ އަދި އެންމެ ތެޔޮ ހަރަދު ކުޑަ އެއް ސައިކަލުކަމުގައިވާ ސޯލް.ޖީޓީ ވަނީ މި ޕްރޮމޯސަންގައި ބައިވެރިކޮށްފައެވެ.

އެލިޔާ އިންވެސްޓްންޓް އަދި އީވޯ ހޯމްގެފަރާތުންވެސް ވަނީ ދިރާގުން ރޯދަމަހާ ދިމާކޮށް މިފަދަ ފުރުސަތެއްދެއްވީތީ އެފަރާތައް ސުކުރު ދަންނަވާފައެވެ.