ސަރުކާރުގެ މަތީފަންތީގައި އުތުރަށް ނިސްބަތްވާ މީހުން މަދުވުމަކީ އުތުރަށް ދޭންޖެހޭ ސަމާލުކަން ކުޑަވާން ޖެހޭނެ ސަބަބެއް ނޫން: އާތިފް

ސަރުކާރުގެ މަތީފަންތީގައި އުތުރަށް ނިސްބަތްވާ މީހުން މަދުވުމަކީ އުތުރަށް ސަރުކާރުން ދޭންޖެހޭ ސަމާލުކަން ކުޑަވާން ޖެހޭނެ ސަބަބެއް ނޫން ކަމަށް  އަތޮޅު ކައުންސިލުގެ ނައިބު ރައީސް އަހުމަދު އާތިފް ވިދާޅުވެއްޖެ އެވެ.

ވީޓީވީން ގެނެސްދޭ ފަސްމަންޒަރު ޕްރޮގުރާމުގައި ހދ. އަތޮޅުގެ ތަރައްގީއާ ބެހޭ ގޮތުން ވާހަކަ ދައްކަވަމުން އަހުމަދު އާތިފް ވިދާޅުވީ ސަރުކާރުގެ މަތީފަންތީގައި އުތުރަށް ނިސްބަތްވާ މީހުން މަދުވުމަކީ އުތުރަށް ސަރުކާރުން ދޭންޖެހޭ ސަމާލުކަން ކުޑަވާން ޖެހޭނެ ސަބަބެއް ނޫން ކަމަށާއި ކުރީގެ ބޮޑުތިލަދުންމަތީގެ ގޮތުގައި މިހާރުވެސް އުތުރު ފެންނިގެން ދިއުމަކީ ވަރަށް ބޮޑު އުއްމީދެއް ކަމަށެވެ.

ހދ. އަތޮޅު ކައުންސިލުން ބައެއް ކަންތައް ކުރަން ކިތަންމެ ބޭނުންވިޔަސް ކައުންސިލުގެ މާލީ ތަނަވަސްކަން ނެތުމުން ކުރަން ބޭނުންވާ ގިނަ ކަންތައް ނުކުރެވި ވާކަމަށެވެ. އެހެންނަމަވެސް ކައުންސިލުގެ މާލީ ފުއްދުންތެރިކަން ހުރިވަރަކުން އެކަންކަން ކުރަމުން ގެންދާނެ ކަމަށް އާތިފް ވިދާޅުވި އެވެ. އަދި ރައްޔިތުންގެ ތަރައްގީއަށް ކޮންދޭޖެހުނު ކޮންމެ ކަމެއްވެސް ކޮށްދިނުމަށް ތިބީ ތައްޔާރަށް ކަމަށް ވިދާޅުވި އެވެ.

އެގޮތުން އޭނާ ވަނީ ޕާސްޕޯޓްގެ ހިދުމަތް ދިނުމަށް ދާދިފަހުން ކުޅުދުއްފުށީގައި ހުޅުވި އޮފީހަކީ އަތޮޅު ކައުންސިލުގެ މާލިއްޔާއިން 2 ލައްކަށް ވުރެ ގިނަ ފައިސާ ހަރަދުކޮށްދެން ހަދާފައިވާ ތަނެއްކަން ފާހަގަކޮށްފަ އެވެ. އަދި މިހާރުވެސް އަތޮޅު ކައުންސިލުން އަތޮޅުގެ ރަށްރަށުގައި އައިޑިކާޑު ކަލެކްޓިން ފޮއިންޓްތަކެއް ގާއިމް ކުރުމުގެ މަސައްކަތް ކުރަމުންދާކަން ވެސް ފާހަގަކޮށްފަ އެވެ.

ދާއިރާގެ 6 މަޖިލިސް މެންބަރުނާއި ކައުންސިލުތަކާއި ރައްޔިތުން އެކައްޗެއް ކިޔާ ސަރުކާރާ ގުޅިގެން އަތޮޅުގެ ތަރައްގީއަށް މަސައްކަތް ކުރުމަށް އޭނާ އެދިލެއްވި އެވެ.

ވީޓީވީގެ ފަސްމަންޒަރު ޕުރޮގުރާމުގައި އާތިފްގެ އިތުރުން އަތޮޅު ކައުންސިލުގެ ރައީސް އާދަމް ނާސިރާއި އެކައުންސިލު މެންބަރު ހުސެއިން ޝަގީފް ވެސް ބައިވެރިވި އެވެ.