ސެމްސަންގ ފޯނުތަކުގެ ރާއްޖޭގެ އޮޕަރޭޓަރަކަށް އުރީދޫ ހަމަޖައްސައިފި

ސެންސަންގ ކުންފުނީގެ ފޯނުތަކުގެ ރާއްޖޭގެ އޮޕަރޭޓަރަކަށް އުރީދޫ ހަމަޖައްސައި، އުރީދޫ އެލްޓީއީ ފޯޖީގެ ހިދުމަތް ސެމްސަންގ ފޯނުތަކަށް ދޫކޮށްފި އެވެ.

އުރީދޫ މޯލްޑިވްސް ސެމްސަންގް މޯބައިލް އުފެއްދުންތަކުގެ ދިވެހިރާއްޖޭގެ ރަސްމީ ޓެލެކޮމް ނެޓްވޯކަށް މިއަދު ވެފައިވާއިރު އުރީދޫއަކީ ރާއްޖޭގައި ސެމްސަންގް ފޯނު ބޭނުންކުރާ ކަސްޓަމަރުންނަށް އެންމެ ފުރިހަމަކަމާއެކު އިންޓަނެޓް ތަޖުރިބާ ކުރެވޭނެ އެލްޓީއީ ފޯޖީ ހިދުމަތްދޭ ހަމައެކަނި ނެޓްވޯކުކަން ފާހަގަކޮށްލެވެ އެވެ.

ސެމްސަންގްއާއެކު އުރީދޫއިން ހެދި މިއެއްބަސްވުމުގެ ދަށުން އެންމެ ފަހުގެ ސެމްސަންގް ޑިވައިސްތައްކަމަށްވާ ސެމްސަންގް ގެލެކްސީ އެސް5 އަދި ސެމްސަންގް ގެލެކްސީ ކޯ އެލްޓީއީގެ ފޯނުތައް އުރީދޫގެ ސްޕަރފާސްޓް ފޯޖީ މިހާރު ބޭނުންކުރެވޭނެ ކަމަށް އުރީދޫއިން މައުލޫމާތުދެ އެވެ.

ރާއްޖޭގައި ސެމްސަންގް މޯބައިލްގެ ހަމައެކަނި އޮޕަރޭޓަރަށް އުރީދޫ ވުމަކީ އަޅުގަނޑުމެން ވަރަށް ފަހުރުވެރިވާ ކަމެއް. މިއިންވެސް ދައްކުވައިދެނީ އަޅުގަނޑުމެންގެ އެޑްވާންސް ނެޓްވޯކުގެ ވަރުގަދަކަން، އަދި މިއީ އަޅުގަނޑުމެންގެ ކަސްޓަމަރުންނަށް ސުޕަރފާސްޓް ފޯޖީ ނެޓްވޯކު އެންމެ ފުރިހަމަ ޑިވައިސްތަކުގައި ތަޖުރިބާކޮށްލުމަށް ލިބުނު ރަނގަޅު ފުރުސަތެއް” އުރީދޫ ސީއީއޯ ވިކްރަމް ސިންހަ ވިދާޅުވި އެވެ.

އުރީދޫއިން ވަނީ ސެމްސަންގްގެ ޑިވައިސްތަކަށް ހާއްސަ ޕެކޭޖެއް ތައާރަފުކޮށްފަ އެވެ. އެ ފެކޭޖުގެ ދަށުން ސެމްސަންގް ގެލެކްސީ ކޯ އެލްޓީއީ ފޯނު މިހާރު އުރީދޫ ޕޯސްޓްޕެއިޑްގެ 3 މަހުގެ ކޮންޓްރެކްޓެއްގެ ދަށުން ބައްލަވައިގަންނަވާ އިރު އެންމެ 2823 ރުފިޔާ ދައްކަވައިގެން ލިބިވަޑައިގަންނަވާނެ ކަމަށް އުރީދޫއިން ބުނެ އެވެ. އަދި ލިބިވަޑައިގަންނަވާ އުރީދޫ ޕޯސްޓްޕެއިޑް ޕެކޭޖާއިއެކު 2ޖީބީ ޑޭޓާ އެލަވަންސާއެކު ހިލޭ ލޯކަލް ކޯލު އަދި އެސްއެމްއެސްގެ އިތުރުން ބޮޑެތި އައިޑީޑީ ޑިސްކައުންޓްތައް ލިބިވަޑައިގަންނަވާނެ ކަމަށްވެސް އުރީދޫއިން މައުލޫމާތުދެ އެވެ.

އަދި ސެމްސަންގް ގެލެކްސީ އެސް5 އުރީދޫ ޕޯސްޓްޕެއިޑް ޕްލެޓިނަމް ޕެކޭޖާއިއެކު 12826 ރުފިޔާ އަށް މިހާރު ލިބޭއިރު ފުރަތަމަ މަހުގެ މަހުފީ ކަމަށްވާ 999 ރުފިޔާ އަލަށް ނަންގަވާ ކަނެކްޝަންތަކުން ނުނަގާނެ ކަމަށްވެސް އުރީދޫއިން ބުނެ އެވެ.

ސެމްސަންގް ޑިވައިސްތައް މެދުވެރިކޮށް ސުޕަރފާސްޓް ފޯޖީ ބޭނުންކުރުމުގެ އިތުރުން މިހާރު އުރީދޫ ކަސްޓަމަރުންނަށް ރާއްޖެއިން ގޫގުލް ޕްލޭ ސްޓޯރއަށް ވަދެ ކޮންޓެންޓް ފަސޭހަކަމާއިއެކީ ޑައުންލޯޑު ކުރެވޭނެ ކަމަށް އުރީދޫއިން ބުނެ އެވެ.

އުރީދޫ ފިހާރަތަކުގެ އިތުރުން ސެމްސަންގްގެ ރާއްޖޭގެ އޮތަރައިޒްޑް ޑިސްޓްރިބިއުޓަރ ހައިކްއިން އޮރިޖިނަލް ސެމްސަންގް ޑިވައިސްތައް މިހާރު ލިބޭނެ އެވެ.

މިއެއްބަސްވުމުގެ ދަށުން އުރީދޫއާއި ހައިކް މެދުވެރިކޮށް ރާއްޖޭގައި ސެމްސަންގް ކަސްޓަމަރުންނަށް އިތުރު ފުރިހަމަކަމަކާއިއެކީ ހިދުމަތް ދިނުމަށް ސެމްސަންގަށް ފުރުސަތު ލިބިގެންދާއިރު ސެމްސަންގްގެ އެންމެ ޒަމާނީ ޕްރޮޑަކްޓްސްތައް އެންމެ ފުރިހަމަ ފެންވަރުގައި ކަސްޓަމަރުންނަށް ތަޖުރިބާކޮށް ދިރިއުޅުން އިތުރަށް ފުރިހަމަ ކުރުމަށް ފުރުސަތު ލިބިވގެންދާނެ ކަމަށް އުރީދޫއިން ބުނެ އެވެ