ކޯޓު އަމުރެއްގެ ދަށުން ހޯދަމުން ދިޔަ މީހަކު މަސްތުވާތަކެއްޗާއެކު ހައްޔަރުކޮށްފި

ބަންދުގައި ބަހައްޓައިގެން ކޯޓަށް ހާޒިރުކޮށްދިނުމަށް ފުލުހުންގެ މައްޗަށް ޑްރަގް ކޯޓުން ކޮށްފައިވާ އަމުރަކާ ގުޅިގެން ހޯދަމުންދިޔަ މީހަކު މަސްތުވާތަކެއްޗާއެކު ކުޅުދުއްފުށިން ހައްޔަރުކޮށްފި އެވެ.

ފުލުހުން ބުނީ ހައްޔަރުކޮށްފައިވަނީ 25 އަހަރު މީހެއް ކަމަށާއި އޭނާއަކީ ވައްކަމާއި މާރާމާރީގެ އިތުރުން މަސްތުވާތަކެތީގެ މައްސަލަތަކުގެ ރެކޯޑް އޮންނަ މީހެއް ކަމަށެވެ.

ކުޅުދުއްފުށިން ހައްޔަރުކުރި މި މީހާއަކީ ކޮން ރަށެއްގެ މީހެއްކަން ފުލުހުން ހާމަކޮށްފައެއް ނުވެއެވެ.

އޭނާ ހައްޔަރުކޮށްފައިވަނީ މި ހަފުތާގެ ހޯމަ ދުވަހުގެ ރޭ ކުޅުދުއްފުށިންނެވެ. އޭނާ ހައްޔަރުކޮށް އޭނާގެ ހަށިގަނޑާއި އެވަގުތު އޭނާ ހުރިތަން ބަލައިފާސްކުރިކުރުމުން އޭނާ ހުރި ތަނުން މަސްތުވާތަކެތިކަމަށް ޝައްކުކުރެވޭ އެއްޗެއްހުރި ރަބަރު ޕެކެޓެއް ފެނިފައިވާ ކަމަށް ފުލުހުން ބުންޏެވެ.