އަންނަ އަހަރުގެ ބަޖެޓުގައި އެންމެ އިސްކަމެއްދީފައިވާނީ މަސް މާރުކޭޓާއި ލޯކަލް މާރުކޭޓު އެޅުމަށް: ކުޅުދުއްފުށީ ކައުންސިލް

ކުޅުދުއްފުށީ ކައުންސިލުގެ ބަޖެޓުގައި އަންނަ އަހަރަށް އެންމެ އިސްކަމެއްދީގެން ހިމަނާފައިވާނީ ކުޅުދުއްފުށީގައި މަސް މާރުކޭޓަކާއި ލޯކަލް މަރުކޭޓެއް އެޅުމަށް ކަމަށް ކުޅުދުއްފުށީ ކައުންސިލުގެ ރައީސް އަލީ މުހައްމަދު ވިދާޅުވެއްޖެ އެވެ.

މި ނޫހުން ކުރި ސުވާލަކަށް ޖަވާބުދެއްވަމުން ކައުންސިލުގެ ރައީސް ވިދާޅުވީ އަންނަ އަހަރުގެ ބަޖެޓު ނިންމާ ފިނޭންސް މިނިސްޓްރީއާ ހަވާލުކޮށްފައިވާނެ ކަމަށާއި މިފަހަރުގެ ބަޖެޓުގައި އެންމެ އިސްކަމެއްދީގެން ހިމަނާފައިވާނީ އިޖުތިމާއީ ކަންތައްތަކަށް ކަމަށެވެ. އެގޮތުން ދެ މާރުކޭޓަކީ އެންމެ އިސްކަމެއް ދެވޭނެ ކަންތައް ކަމަށްވެސް ވިދާޅުވި އެވެ.

މި އަހަރު މަރުކޭޓު ނޭޅި ލަސްވަމުންދަނީ ބަޖެޓުގެ ތާށިކަމުން ކަމަށް އަލީ ވިދާޅުވި އެވެ. އެހެންނަމަވެސް އަންނަ އަހަރުގެ ބަޖެޓުގައި ހިމަނައިގެން މާރުކޭޓް އެޅޭނެކަމުގެ އުއްމީދު އެބަ އޮތް ކަމަށްވެސް އޭނާ ވިދާޅުވި އެވެ.

ރައީސް ވިދާޅުވި ގޮތުގައި ފިނޭންސް މިނިސްޓްރީން އެ ކައުންސިލަށް އަންގާފައިވަނީ 18 މިލިއަނަށްވުރެ ބަޖެޓު ބޮޑު ނުކުރުމަށެވެ. އެހެންކަމުން ހުށަހަޅާފައިވާނީ އެވަރުގެ ބަޖެޓެއް ކަމަށްވެސް ރައީސް ވިދާޅުވި އެވެ. އަދި ބަޖެޓާ މެދު ހިތްހަމަޖެހޭ ކަމަށާއި އެއީ މި އަހަރުގެ ބަޖެޓަށްވުރެ ބޮޑު ބަޖެޓެއްކަން ވެސް ރައީސް ފާހަގަކުރި އެވެ. އަދި އެ ބަޖެޓް މިނިސްޓްރީން ކުޑަނުކުރާނެ ކަމަށް އުއްމީދު ކުރައްވާ ކަމަށްވެސް ރައީސް ވިދާޅުވި އެވެ.

ފިނޭންސް މިނިސްޓްރީން ކުޅުދުއްފުށީ ކައުންސިލަށް ކުރިން އަންގާފައިވަނީ 10.7 މިލިއަން ރުފިޔާއަށްވުރެ އިތުރުނުވާ ގޮތަށް އަންނަ އަހަރުގެ ބަޖެޓް ތައްޔާރުކުރުމަށެވެ. އެއީ ކައުންސިލުތަކަށް ދޫކޮށްފައިވާ ބަޖެޓުތަކުގެ ތެރެއިން 4 ވަނައަށް އެންމެ ބޮޑު ބަޖެޓްކަން ފާހަގަކޮށްލެވެ އެވެ.