ޝަހީދު ހުސެއިން އާދަމްގެ މަންމަ އާއި ބައްޕަ ހައްޖަށް ފޮނުވަން ހަމަޖެހިއްޖެ

1988 އަހަރުގެ ނޮވެމްބަރ 3 ގެ އުދުވާނުގައި ޝަހީދުވި ކޯޕްރަލް ސުހެއިން އާދަމްގެ މަންމަ އައިޝަތު ހަސަން އަދި ބައްޕަ އާދަމް މުހައްމަދު ހައްޖަށް ފޮނުވުމަށް ނިންމައިފި އެވެ.

ޕީޕީއެމްގެ ޕާލަމެންޓްރީ ގުރޫޕްގެ ލީޑަރު އަދި ވިލިމާލެ ދާއިރާގެ މެންބަރު އަހުމަދު ނިހާން ހުސެއިން މަނިކު ވިދާޅުވި ގޮތުގައި އާދަމް މުހައްމަދާއި އައިޝަތު ހަސަން ހައްޖަށް ފޮނުވުމުގައި ފައިސާގެ ގޮތުން އެހީތެރިކަން ދެއްވާފައިވަނީ ރައީސް މައުމޫންގެ އަންހެން ކޮއްކޮއެއްގެ ފިރިމީހާ އަދި ނަސަންދުރާ ހިންގެވުމާއި ހަވާލުވެހުންނެވި އަހުމަދު މަނިކެވެ. މަނިކަކީ ރައީސް ޔާމީންގެ ޅިއަނެއްކަންވެސް ފާހަގަކޮށްލެވެ އެވެ.

ޝަހީދު ހުސެއިން އާދަމްގެ މަންމައާއި ބައްޕަ ހައްޖަށް ފޮނުވުމަށް އެންމެ ބޮޑު މަސައްކަތެއް ކޮށްދެއްވީ ކުރީގެ ރައީސް މައުމޫން އަބުދުލް ގައްޔޫމް ކަމަށްވެސް ނިހާން ވިދާޅުވެފައިވެ އެވެ.

އަދި ރައީސް ޔާމީން އަދި ރައީސް މައުމޫންގެ ނަންފުޅުގައި އެ ދެމަފިރިން ބަލަހައްޓާނޭ އެހީތެރިޔަކު ވެސް ފޮނުވާނެކަމަށް ނިހާން ވިދާޅުވެފައިވެ އެވެ.

ނޮވެމްބަރ 3 ގައި ދިވެހި ހާއިނުންގެ ބަޔަކު ސްރިލަންކާގެ ޓެރަރިސްޓު ޖަމާއަތަކާއި ގުޅިގެން ރާއްޖެ އަރައި ހިންގި އުދުވާނުގައި ސިފައިންގެ މައި މަރުކަޒަށް ހަމަލާދިން ވަގުތު އެމަރުކަޒުގެ މައި ގޭޓުގައި ޓާސްކް ފޯސް ޑިއުޓީގައި ތިއްބެވި ދެބޭކަލުންގެ ތެރެއިން އެއްބޭކަލަކީ ކުޅުދުއްފުއްޓަށް އުފަން ކޯޕްރަލް ހުސެއިން އާދަމް އެވެ.

ދުޝްމަނުން ދެމުންގެންދިޔަ ބަޑީގެ ނުރައްކާތެރި ހަމަލާތަކުން ސިފައިންގެ މައި މަރުކަޒު ދިފާއުކުރެއްވުމަށްޓަކައި މަސައްކަތްކުރައްވަމުން ގެންދަވަނިކޮށް، އެހަމަލާއިން ކޯޕްރަލް ހުސެއިން އާދަމް ހަށިގަނޑުގެ އެތަން މިތަނަށް ވަޒަން އަރައި ޝަހީދުވި އެވެ.

ހިތްވަރުގަދަކަމުގެ ލާމަސީލު ނަމޫނާއެއް ކަމުގައިވާ ކޯޕްރަލް ހުސެއިން އާދަމް ޝަހީދުވިއިރު އޭނާ ސިފައިންގެ ހިދުމަތުގައި އުޅުއްވާތާ ވީ 4 އަހަރާއި 5 މަހާއި 24 ދުވަހެވެ.