އެލްޖީއޭއަށް ހުށަހަޅަންޖެހޭ ރިޕޯޓު ހުށަހެޅީ ހދ އަތޮޅުގެ އެންމެ ރަށަކުން!

ލާމަރުކަޒީ ގާނޫނުގެ ދަށުން ކޮންމެ އަހަރެއްގެ ޖުލައި 10 ގެ ކުރިން ލޯކަލް ގަވަރމެންޓް އޮތޯރިޓީ (އެލްޖީއޭ) އަށް ކައުންސިލުތަކުން ހުށަހަޅަންޖެހޭ ރިޕޯޓު، ހދ އަތޮޅުގެ ރަށްތަކުގެ ތެރެއިން ހުށަހަޅާފައިވަނީ އެންމެ ރަށަކުން ކަމަށް އެލްޖީއޭއިން ބުނެފި އެވެ.

ހދ އަތޮޅުން އެލްޖީއޭއަށް ރިޕޯޓު ފޮނުވާފައިވަނީ ހދ. ވައިކަރަދޫ ކައުންސިލުން ނެވެ.

އަތޮޅު ކައުންސިލުތަކުގެ ތެރެއިން 12 އަތޮޅު ކައުންސިލަކުން ރިޕޯޓު ފޮނުވާފައިވާއިރު، ހދ. އަތޮޅު ކައުންސިލުންނާއި ހއ. އަތޮޅު ކައުންސިލުގެ އިތުރުން ށ. އަތޮޅު ކައުންސިލުންވެސް އަހަރުގެ ފުރަތަމަ ހަ މަސް ދުވަހުގެ ރިޕޯޓު ފޮނުވާފައިވާ ކަން ފާހަގަ ކޮށްލެވެއެވެ.

އެލްޖީއޭއިން މިއަދު އާންމުކޮށްފައިވާ ނޫސްބަޔާނެއްގައި ބުނެފައިވާ ގޮތުގައި ރަށްރަށުގެ ރަށު ކައުންސިލުތަކުން އެ އޮތޯރިޓީއަށް ހުށަހަޅަންޖެހޭ ރިޕޯޓު ހުށަހަޅާފައިވަނީ 72 ރަށު ކައުންސިލަކުންނެވެ. 12 އަތޮޅު ކައުންސިލަކުން ގާނޫނުގައި ބުނާ މުއްދަތުގެ ތެރޭގައި ރިޕޯޓު ފޮނުވާފައިވާއިރު، އެއްވެސް ސިޓީ ކައުންސިލަކުން ރިޕޯޓު ފޮނުވާފައެއް ނުވެއެވެ.

އެލްޖީއޭގެ ނޫސްބަޔާނުގައި ބުނެފައިވަނީ ކޮންމެ އަހަރެއްގެ ޖުލައި މަހުގެ 20 ވަނަ ދުވަހުގެ ކުރިން އެ އަހަރެއްގެ ފުރަތަމަ ހ މަސްދުވަހު ކައުންސިލުން ހިންގި ހަރަކާތްތަކުގެ ތަފްސީލު އަތޮޅު ކައުންސިލުތަކުންނާއި ސިޓީކައުންސިލު ތަކުން އެ އޮތޯރިޓީއަށް ހުށަހެޅުމަކީ ކައުންސިލުތަކަށް ލާމަރުކަޒީ ގާނޫނުން މަތިކޮށްފައިވާ ޒިންމާއެއް ކަމެއް ކަމަށެވެ.

އެލްޖީއޭއަށް ރިޕޯޓު ނުފޮނުވާ ކައުންސިލުތަކުގެ ތެރޭގައި ހިމެނޭ ކުޅުދުއްފުށީ ކައުންސިލުގެ ރައީސް އަލީ މުހައްމަދު ވިދާޅުވީ ރިޕޯޓު ހުށަހެޅިފައިނެތް ކަމުގައި ވީނަމަވެސް މަސައްކަތުގެ ޔައުމިއްޔާތައް ކައުންސިލުގައި ހުންނާނެ ކަމަށާއި އައު ކައުންސިލަށް އަދި އެކަމުގައި އިސްކަމެއް ދެއްވިފައި ނުވަނީ ކަމަށެވެ. އެހެންނަމަވެސް ކުރިއަށް އޮތްތަނުގައި ކައުންސިލުތަކުގެ ގާނޫނާއި ކައުންސިލު ތަކުގެ އޮނިގަނޑާ އެއްގޮތަށް ކަންކަން ކުރިއަށް ގެންދިއުމަށް މަސައްކަތްކުރައްވާނެ ކަމަށެވެ.

ލާމަރުކަޒީ ގާނޫނުގައި ބުނެފައިވާގޮތަށް އާންމު ރައްޔިތުންނާއެކު ބާއްވަންޖެހޭ ބައްދަލުވުންތައް ވެސް ގިނަ ކައުންސިލުތަކަކުން ނުބާއްވައެވެ.