މަސްތުވާތަކެތީގެ ބޮޑެއް ކަމަށް ބުނެ ފުލުހުން އަތުލައިގަތް މީހާ ކުޅުދުއްފުށީ ކޯޓުން ދޫކޮށްލައިފި

ކުޅުދުއްފުއްޓަށް މަސްތުވާތަކެތި އެތެރެކޮށް އެތަކެތީގެ ވިޔަފާރިކުރާ “ބޮޑެއް” ކަމަށް ފުލުހުން ބުނެ މިދިޔަ ޖުލައި މަހު އަތުލައިގަތް ހދ.ކުޅުދުއްފުށީ އަބަދަށްހިޔާގެ، އަބުދުލް ހަމީދު(39) ކުޅުދުއްފުށީ މެޖިސްޓްރޭޓް ކޯޓުން އިއްޔެ ދޫކޮށްލައިފި އެވެ.

އަބުދުލް ހަމީދު ކޯޓުން ދޫކޮށްލައިފައިވަނީ މުއްދަތު އިތުރުކުރުމަށް 6 ވަނަ ފަހަރަށް ކޯޓަށް ހާޒިރުކުރުމުން އިތުރަށް އޭނާ ބަންދުގައި ބަހައްޓަން ނުފެންނަ ކަމަށް ކޯޓު ބުނެކަމަށް ފުލުހުންގެ މީޑިއާއިން މިނޫހަށް މައުލޫމާތު ދިނެވެ.

ކުޅުދުއްފުށީ މެޖިސްޓްރޭޓް ކޯޓުން ބުނީ އޭނާ ދޫކޮށްލައިފައިވަނީ ފުލުހުން ހުށަހެޅި އިޖުރާއަށް ތަކަށް ބަލާފައި ކަމަށެވެ.

އޭނާގެ މުއްދަތު ކޯޓުން އެންމެ ފަހުން އިތުރުކޮށްދީފައި ވަނީ މި އޯގަސްޓް މަހުގެ 8 ވަނަ ދުވަހު އެދުވަހު އޭނާގެ ބަންދުގެ މުއްދަތަށް 8 ދުވަސް ޖަހާދީފައިވެ އެވެ. އެއީ ކޯޓުން އޭނާގެ މުއްދަތު އިތުރުކޮށްދިން 5 ވަނަ ފަހަރެވެ. އަދި އޭގެ ކުރިން ކޯޓުން ވަނީ ހަމީދުގެ ބަންދުގެ މުއްދަތު އެކި ފަހަރު މަތިން އިތުރުކޮށް ދީފަ އެވެ.

އެގޮތުން މުއްދަތު އިތުރު ކޮށްފައިވަނީ 2014 ޖޫން 27 ވަނަ ދުވަހުގެ 10 ދުވަސް، 2014 ޖުލައި 7 ވަނަ ދުވަހު 15 ދުވަސް، 2014 ޖުލައި 22 ވަނަ ދުވަހު 10 ދުވަސް އަދި 2014 އޯގަސްޓް 1 ވަނަ ދުވަހު 7 ދުވަހެވެ.

ކުޅުދުއްފުށިން އަބުދުލް ހަމީދު ހައްޔަރުކުރީ، އޭނާ ކުޅުދުއްފުއްޓަށް މަސްތުވާތަކެތި އެތެރެކޮށް، ފުޅާ ދާއިރާއެއްގައި އެތަކެތީގެ ވިޔަފާރިކުރަމުންދާކަމަށް، އަޕަރ ނޯތު ޕޮލިސް ޑިވިޝަންގައި ހަރަކާތްތެރިވާ ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން، ކުޅުދުއްފުށި ޕޮލިސް ސްޓޭޝަނާއި އިންޓެލިޖެންސް ގުޅިގެން ހިންގި އޮޕަރޭޝަނެއްގަ ކަމަށްވެސް ފުލުހުން މައުލޫމާތުދެ އެވެ.

ފުލުހުން މައުލޫމާތުދޭ ގޮތުގައި ޖޫން 27 ވަނަ ދުވަހުގެ ހެނދުނު ކުޅުދުއްފުއްޓަށް ދިޔަ މާލެ ދަތުރުކުރާ ބޯޓަކުން ގެންދިޔަ ފޮށިގަނޑަކާ އޭނާހަވާލު ވުމުން، އޭނާއާއި އެ ފޮށިގަނޑު ފުލުހުންގެ ބެލުމުގެ ދަށަށް ގެނެސް ބަލައި ފާސްކުރި އިރު މަސްތުވާތަކެތި ކަމަށް ބެލެވޭ އެއްޗެއް ހުރި 3 ރަބަރު ޕެކެޓާއި ބާޒާރު ކޮތަޅެއްގެ އިތުރުން މަސްތުވާތަކެތި ބަންދުކުރަން ބޭނުންކުރާ ޒާތުގެ ގިނަ އަދަދެއްގެ ކުދި ޕެކެޓް ތަކެއް ފެނިފައިވެ އެވެ.

އޭނާ ފުލުހުންގެ ބެލުމުގެ ދަށަށް ގެނެސް، އޭނާގެ ކުޑަކަމުދާތަކެތި ތަހުލީލު ކުރިއިރު މަސްތުވާތަކެތީގެ ބާވަތަކަށް ވަނީ ޕޮޒިޓިވް ވެފައިވާ ކަމަށްވެސް ފުލުހުން ބުނެ އެވެ.