ރޯހައުސަށް އެދި ހުށަހެޅި ކުޅުދުއްފުށީ މީހުންގެ ފޯމުތައް އިވެލުއޭޓުކޮށް ނިމިއްޖެ

ކުޅުދުއްފުށީގައި އިމާރާތް ކޮށްފައިވާ ރޯހައުސްތަކަށް އެދި ފޯމް ހުށަހެޅި ފަރާތްތަކުގެ ތެރެއިން ކުޅުދުއްފުށީ މީހުންގެ ފޯމުތައް އެއްކޮށް އިވެލުއޭޓުކޮށް ނިންމާލެވިފައިވާ ކަމަށް ރޯހައުސް އިވެލުއޭޓްކުރާ ކޮމެޓީ ބުނެފި އެވެ.

ރޯހައުސް އިވެލުއޭޓް ކުރާ ކޮމެޓީގެ މެމްބަރެއް ކަމަށްވާ ކައުންސިލަރު އަލީ ހާޝިމް މިނޫހަށް ވިދާޅުވީ ރޯހައުސަށް އެދި ހުށަހެޅި ފޯމުތަކުގެ ތެރެއިން ކުޅުދުއްފުއްޓަށް ނިސްބަތްވާ ހުރިހާ މީހުންގެ ފޯމުތައް އިވެލުއޭޓުކޮށް ނިންމާލާފައިވާ ކަމަށެވެ.

އޭނާ ވިދާޅުވީ ކޮމެޓީ ނިންމި ގޮތް އިއުލާން ކުރުން ލަސްވެފައިވަނީ ފޯމް ހުޅަހެޅި މީހުންގެ ތެރެއިން ކުޅުދުއްފުށީ މީހުންނާ ކައިވެނިކޮށްގެން އުޅޭ އެހެން ރަށްރަށުގެ މީހުންގެ މައުލޫމާތު ހޯދުމަށް ހައުންސިން މިނިސްޓްރީން އެންގުމުން ކަމަށެވެ.

ހާޝިމް ވިދާޅުވީ ހައުންސިން މިނިސްޓްރީން އެގޮތަށް އެންގުމުން މިހާރު ވާނީ އެމީހުންނާ ބެހޭ މައުލޫމާތުތައް ހޯދުމަށް ސިޓީ ކައުންސިލުތަކަށާއި ރަށު ކައުންސިލުތަކުގައި އެދިފައި ކަމަށެވެ. އަދި ކުރިއަށް އޮތް ދޮޅު މަހެއްހާ ދުވަހުގެ ތެރޭގައި ޕޮއިންޓް ދިން އުސޫލުތައް އާންމުކޮށް ޝަކުވާ ހުޅަހެޅުމުގެ ފުރުސަތު ހުޅުވާލެވޭނެ ކަމަށެވެ.

އޭނާ ވިދާޅުވީ ކުޅުދުއްފުއްޓަށް ހިޖުރަކުރަން ބޭނުންވާ ފަރާތްތަކުގެ ފޯމް އިވެލުއޭޓުކުރުމުގެ މަސައްކަތް ބާރަށް ކުރިއަށްދާ ކަމަށެވެ.

ކުޅުދުއްފުށީގައި އިމާރާތްކޮށްފައިވާ 167 ރޯހައުސަށް އެދުމުގެ ފުރުސަތު މި އަހަރުގެ މާޗު މަހުގެ ތެރޭގައި ކައުންސިލުން ހުޅުވާލުމުން އެކަމަށް 628 ފަރާތަކުން ކުރިމަތިލާފައިވެ އެވެ. އެއީ ކުޅުދުއްފުށީ މީހުންނަން ދޫކުރަން ހަމަޖެހިފައިވާ 100 ރޯހައުސަށް 460 ފަރާތަކާއި ކުޅުދުއްފުއްޓަށް ހިޖުރަކުރަން ބޭނުންވާ ފަރާތަކަށް ދޫކުރުމަށް ހަމަޖެހިފައިވާ 60 ރޯހައުސަށް އެދި ހުށަހެޅި 168 ފަރާތެވެ.

މީގެ ތެރެއިން ބާކީ ހުރި 5 ރޯހައުސް ވަނީ ހައުސިންގ މިނިސްޓްރީގެ އެންގުމަށް އެކި ހަލާތްތަކުގައި ބޭނުންކުރުމުގެ ގޮތުން ކައުންސިލަށް ނަގާގޮތަކަށް ހަމަޖައްސާފަ އެވެ. އަދި ދެންހުރި އަނެއް 2 ރޯހައުސްގައި މާފިލާފުށީގެ ދެ އާއިލާއެއް މިހާރު އަންނަނީ ދިރިއުޅެމުންނެވެ.

ޑައުން ޕޭމެންޓުގެ ގޮތުގައި ރޯހައުސަށް ދައްކަންޖެހެނީ 19000ރ އެވެ. އަދި އިންސްޓޯލްމެންޓުގެ ގޮތުގައި މަހަކު ދައްކަން ޖެހެނީ 3000ރ އެވެ.