ރެޑްކުރެސެންޓް ހދ. ގޮފިން ޣައްޒާއަށް އެހީތެރިވުމަށް ހިންގި ހަރަކާތްތަކުން 93000 ވުރެ ގިނަ ރުފިޔާ ހޯދައިފި

ރެޑްކުރެސެންޓް ހދ ގޮފިން ފަލަސްތީނުގެ ޣައްޒާގެ ރައްޔިތުންނަށް އެހީތެރިވުމުގެ ގޮތުން ހިންގި ހަރަކާތްތަކުން 93000 ވުރެ ގިނަ ރުފިޔާ ހޯދައިފި އެވެ.

އެގޮތުން ޖުމުލަ 93105.96 ރުފިޔާގެ އިތުރުން 51 ޑޮލަރާއި 10 ސައުދީ ރިޔާލާއި 7 އިންޑިޔަން ރުޕީސް އަދި 7 ސްރިލަންކަން ރުޕީސް ލިބިފައިވާކަމަށް ރެޑް ކުރެސެންޓް ހދ ގޮފިން މި ނޫހަށް މައުލޫމާތު ދިނެވެ.

ރެޑްކުރެސެންޓުން ކުޅުދުއްފުށީގެ ތިން ފިހާރައެއްގައި ފަންޑު ފޮށިތަކެއް ބެހެއްޓުމުގެ އިތުރުން ދޮރުން ދޮރަށް ވަނީ ކެމްޕެއިނެއްވެސް ހިންގާފަ އެވެ. ކުޅުދުއްފުށީގައި މި ހިންގުނު ހަރަކާތްތަކުން 77121.96 ރުފިޔާގެ އިތުރުން 49 ޑޮލަރާއި 10 ސައުދީ ރިޔާލާއި 7 އިންޑިޔަން ރުޕީސް އަދި 7 ސްރިލަންކަން ރުޕީސް ވަނީ ލިބިފައިވެ އެވެ.

ރެޑްކުރެސެންޓް ހދ ގޮފިން ފަންޑް ރައިޒިން ހަރަކާތެއް ކުޅުދުއްފުށީގެ އިތުރުން ދެން ހިންގާފައިވަނީ ހަނިމާދޫގަ އެވެ. އެއީ އެ ރަށު “ކެތިއަރާ” ބޮޑުބެރު ގުރޫޕާ ގުޅިގެން ހިންގާފައިވާ ހަރަކާތެކެވެ. ހަނިމާދޫގައި ހިންގި މި ހަރަކާތުން ވަނީ 15984 ރުފިޔާގެ އިތުރުން 2 ޑޮލަރު ލިބިފަ އެވެ.

ފަންޑް ފޮށިތައް މިހާރު ބަންދުކުރެވިފައިވީ ނަމަވެސް ދިވެހި ފައިސާގެ އެހީ ދެއްވަން ބޭނުންވާ ފަރާތްތަކަށް ބީއެމްއެލްގެ އެކައުންޓް ނަންބަރު 001-176022-7701 އަށް ދިވެހި ފައިސާ ޖަމާކުރުމުގެ ފުރުސަތު ހުޅުވާލެވިފައިވާއިރު ޑޮލަރުގެ އެހީތެރިކަން ފޯރުކޮށްދެއްވަން ބޭނުންވާ ފަރާތްތަކަށް ބީއެމްއެލްގެ އެކައުންޓް ނަންބަރު 002-176022-7701 އަށް ޑޮލަރު ޖަމާކުރުމުގެ ފުރުސަތު ވެސް ވަނީ ހުޅުވާލާފަ ކަމަށް ރެޑްކުރެސެންޓް މައުލޫމާތު ދިނެވެ.