ކޮރަޕްޝަނުގެ މައްސަލައެއްގައި ވައިކަރަދޫ ކޯޓުގެ ގާޒީގެ މައްޗަށް ދައުވާކުރަން ފޮނުވައިފި

Aug 18, 2014

ކުޅުދުއްފުށީ ކޯޓުގެ ކުރީގެ ގާޒީ އަދި މިހާރު ވައިކަރަދޫ ކޯޓުގެ ގާޒީ މުހައްމަދު ނިޔާޒުގެ މައްޗަށް ކޮރަޕްޝަނުގެ މައްސަލައެއްގައި ދައުވާ ކުރަން ޕީޖީއަށް ފޮނުވައިފި އެވެ.

މަގާމުގެ ނުފޫޒު ބޭނުންކޮށްގެން ކޮރަޕްޝަން ހިންގި ކަމުގެ ތުހުމަތުގައި ގާޒީ ނިޔާޒުގެ މައްޗަށް ތަހުގީގު ހިންގުމަށްފަހު އޭނާގެ މައްޗަށް ދައުވާ ކުރުމަށް ޕީޖީއަށް ފޮނުވީ އެންޓި ކޮރަޕްޝަން ކޮމިޝަން (އޭސީސީ) އިން އެވެ.

ވައިކަރަދޫއަށް އުފަން ގާޒީ ނިޔާޒު ކުޅުދުއްފުށީ ކޯޓުގެ އިސް ގާޒީއަކަށް ހުންނެވި ދުވަސްވަރު ގަވާއިދާ ހިލާފަށް މުސާރަ ނެންގެވި މައްސަލައެއްގެ އިތުރުން ގަވާއިދާ ހިލާފަށް ލިވިންގ އެލަވަންސް ނެންގެވި މައްސަލައެއް އެންޓި ކޮރަޕްޝަން ކޮމިޝަނުން ވަނީ ބަލާފަ އެވެ.

ކުޅުދުއްފުށީ މެޖިސްޓްރޭޓް ކޯޓް އޮޑިޓް ކުރުމަށްފަހު އޮޑިޓާ ޖެނަރަލް 2011 ވަނަ އަހަރު އާންމުކޮށްފައިވާ އޮޑިޓް ރިޕޯޓެއްގައި ބުނެފައިވާ ގޮތުން ކުޅުދުއްފުށީ މެޖިސްޓްރީ ކޯޓުގައި ހަދާފައިވާ ކޮޓަރިއެއް ބޭނުން ކުރައްވަމުން ލިވިން އެލަވަންސްގެ ގޮތުގައި 34400ރުފިޔާ ގާޒީ ނިޔާޒު ނަންގަވާފައިވެ އެވެ.

އަދި ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންއިން ކުޅުދުއްފުށީ ކޯޓަށް ފޮނުވި ލެޕްޓޮޕް އެ ކޯޓާ ހަވާލު ނުކުރައްވާ އެހެން ކޯޓަކަށް ގާޒީ ނިޔާޒު ބަދަލުވެވަޑައިގެންފައިވާ ކަމަށްވެސް އެ އޮޑިޓް ރިޕޯޓުގައިވެ އެވެ.

މިލިޔުމާއި ގުޅޭ