އަނބިމީހާގެ ކޮއްކޮއަކަށް ޖިންސީ ގޯނާކުރި ޅިޔަނު 15 އަހަރަށް ޖަލަށް ލުމަށް ހިރިމަރަދޫ ކޯޓުން ހުކުމްކޮށްފި

އަބިމީހާ އެއްބަނޑު އަންހެން ކޮއްކޮއަކަށް ޖިންސީ ގޯނާކުރި ޅިޔަނު 15 އަހަރަށް ޖަލަށް ލުމަށް ހދ.ހިރިމަރަދޫ ކޯޓުން މިދިޔަ ހޯމަ ދުވަހު ހުކުމްކޮށްފި އެވެ.

15 އަހަރުގެ މި އަންހެން ކުއްޖާއާ ޖިންސީ ގޯނާ ކުރިކަމުގެ ކުށް ސާބިތުވެ ޖަލަށް ލުމަށް ހުކުމްކޮށްފައިވަނީ ހދ. ހިރިމަރަދޫ، ދޫރެސް، އިބްރާހީމް ޝިޔާމް އަލީ (31އ) ގެ މައްޗަށެވެ.

އިބްރާހީމް ޝިޔާމް އަލީގެ މައްޗަށް އިތުބާރު ކުރެވޭ މަގާމެއްގައި ހުރެ ކުޑަ ކުއްޖަކާ ޖިންސީ އަމަލު ހިންގުމުގެ ކުށުގެ ދައުވާ ދައުލަތުން އުފުލާފައިވަނީ، އޭނާ 2011 މެއި 10 ވަނަ ދުވަހުގެ ރޭގަނޑުގެ ވަގުތެއްގައި އޭނާއަށް ޅިޔަނު ކިޔާ 15 އަހަރުގެ ކުޑަ އަންހެން ކުއްޖަކާ ޖިންސީ އަމަލެއް ހިންގާފައިވާ މައްސަލައާ ގުޅިގެންނެވެ.

އިބްރާހީމް ޝިޔާމް އަލީގެ މައްޗަށް ދައުލަތުން ކޮށްފައިވާ މި ދައުވާއަށް އޭނާ ވަނީ އިންކާރުކޮށްފަ އެވެ.

ނަމަވެސް މި މައްސަލާގައި ޖިންސީ އަނިޔާ ލިބުނު ކުއްޖާގެ ކިޔާދީފައިވާ ކިޔާދިނުމާއި، އޭނާގެ މަޑިކޯ ލީގަލް ރިޕޯޓާއި، ފެމިލީ އެންޑް ޗިލްރަން ސަރވިސް ސެންޓަރުގެ އެސެސްމެންޓް ރިޕޯޓާއި، މޯލްޑިވްސް ޕޮލިސް ސަރވިސްގެ ތަހުގީގު ރިޕޯޓާ ގުޅުން ހުރިކަން އެނގެން އޮތުމާއި މި އެންމެހައި ކަންކަމަށާއި ދައުލަތުން ޝަރީއަތަށް ހުށަހެޅި ހެކިންގެ ހެކިބަހަށް ބަލައި އިބްރާހީމް ޝިޔާމް އަލީގެ މައްޗަށް ކޮށްފައިވާ އިތުބާރު ކުރެވޭ މަގާމެއްގައި ހުރެ ކުޑަ ކުއްޖަކާ ޖިންސީ އަމަލު ހިންގުމުގެ ދައުވާ އެކަށީގެންވާ މިންވަރެއްގެ ޝައްކެއްނެތި ޝަރީއަތަށް ސާބިތުވާކަމަށެވެ.