ސަރުކާރުން ކުޅުދުއްފުއްޓަށް ވެވަޑައިގެންފައިވާ ވައުދުތައް ފުއްދަވައި ދެއްވާނެ: އުމަރު ޒާހިރު

ސަރުކާރުން ކުޅުދުއްފުށީގެ ތަރައްގީއަށް ވެވަޑައިގެންފައިވާ ވައުދުތައް ފުއްދަވައި ދެއްވާނެ ކަމަށް ޕާރފޯމިންގ އާޓްސްގެ އެގްޒެކްޓިވް އިންޗާޖު އުމަރު ޒާހިރު ވިދާޅުވެއްޖެ އެވެ.

ނެޝަނަލް ސެންޓަރ ފޯރ ދި އާރޓްސް (އެން.ސީ.އޭ) އާއި ކުޅުދުއްފުށީ ކައުންސިލް ގުޅިގެން ކުޅުދުއްފުށީގައި ހިންގުމަށް ހަމަޖެހިފައިވާ އާރޓްސް އަދި ޕަރފޯމިންގ އާރޓްސް ކޯސް ފެށުމުގެގޮތުން ކުޅުދުއްފުށީ ތިލަދެކުނު ސިނަމާގައި ރޭ ވާހަކަ ދައްކަވަމުން ރާއްޖޭގެ ކުރީގެ މަޝްހޫރު ލަވަކިޔުންތެރިޔާ އުމަރު ވިދާޅުވީ ” ސަރުކާރުން ނިންމަވާފައިވާ ބައެއް ކަންތައްތަކުގެ ތެރޭގައި ކުޅުދުއްފުއްޓަށް ވެސް ވަރަށް ގިނަ ތަރައްގީތަކެއް ގެނައުމަށް ސަރުކާރުން ވަނީ ވައުދު ވެވަޑައިގަންފަ ” އެވެ.

އޭނާ ވިދާޅުވީ ” އަޅުގަނޑު ހަމަ ދަންނަވާލަން އޮތީ ސަރުކާރުން ވައުދު ފުއްދަވާނޭ، އަޅުގަނޑުމެންނަން ކުޑަކުޑަ ވަގުތުކޮޅެއް ދެއްވާށޭ އިރާދަކުރެއްވިއްޔާ ސަރުކާރުންވި ވައުދު ފުށްދަވާނެ” އެވެ.

މިޖަލްސާގައި ވާހަކަ ދައްކަވަމުން ކުޅުދުއްފުށީ ކައުންސިލުގެ ރައީސް ވިދާޅުވީ ކުޅުދުއްފުއްޓަށް ޓޫރިޒަމް ތައާރަފުވާން ކައިރިވެފައިވާއިރު ކުޅުދުއްފުއްޓަށް މިވަގުތައް އެންމެ މުހިއްމީ އާރޓުގެ ދާއިރާގެ ކޯސްތައް ކަމަށެވެ.

ރޭގެ ރަސްމިއްޔާތު ޝަރަފްވެރިކޮށްދެއްވީ ޖިމްނާސްޓިކާއި ކުޅިވަރުގެ ރޮނގުން ގިނަގުނަ ހިދުމަތްތަކެއް ކޮށްދެއްވާފައިވާ ކުޅުދުއްފުށީ ދެބުދާރުގެ، އާދަމް އިސްމާއީލެވެ. އާދަމްގެ ވާހަކާގައި އަދިވެސް ޖިމްނާސްޓިކް ދަސްކުރަން ޝައުގުވެރިވާ ކުދިން ތިބިނަމަ އެކަން ހިލޭ ސާބަހަށް ދަސްކޮށްދޭން ތައްޔާރަށް ހުންނެވިކަމަށް ވިދާޅުވި އެވެ.

ރޭ ރަސްމިއްޔާތުގައި ޓޭބަލް ޓެނިސް އެސޯސިއޭޝަންގެ ފަރާތުންވަނީ ބޯޅައާއި ރެކެޓް ކުޅުދުއްފުށީ ކައުންސިލާ ހަވާލުކޮށްފަ އެވެ. ޓޭބަލް ޓެނިސް އެސޯސިއޭޝަން ފަރާތުން މިތަކެތި ހަވާލުކޮށްދެއްވީ ރާއްޖޭގެ ނެޝަނަލް ސްޕޯޓްސް ކައުންސިލްގެ މެންބަރު ތާޅަފިލި އަލިމަނިކެވެ. އަދި ކައުންސިލުގެ ފަރާތުން މިތަކެއްޗާ ހަވާލުވެލެއްވީ ކައުންސިލު ރައީސް އަލީ މުހައްމަދެވެ.

15 ދުވަހުގެ މުއްދަތަށް ހިލޭ ކުރިއަށްގެންދިއުމަށް ހަމަޖެހިފައިވާ މިދެކޯހާ ބެހޭ ކުރު ތައާރަފެއް ވަނީ ދީފަ އެވެ. އެގޮތުން ޕަރފޯމިންގ އާރޓްސްބެހޭ ތައާރަފެއް ދެއްވީ އެން.ސީ.އޭގެ ޕަރފޯމިންގ އާރޓްސްގެ އެގްޒެކެޓިވް އިންޗާޖް އުމަރު ޒާހިރެވެ. އަދި ފައިން އާރޓްސްއާބެހޭ ތައާރަފެއް ދެއްވީ އެން.ސީ.އޭގެ އާރޓްސްގެ އެގްޒެކެޓިވް އިންޗާޖް އަދި މަޝްހޫރު ކުރެހުންތެރިޔާ ތާޅަފިލި އަލިމަނިކެވެ. ރާއްޖޭގެ މަޝްހޫރު ފޮރިންސިކް އާރޓިސްޓް އަލީ އާމިރު ވަނީ ފައިން އާރޓްސްއާބެހޭ ވީޑިއޯ ޕްރެޒެންޓޭޝަނެއް ހުށަހަޅުއްވާފަ އެވެ.

[yass cats=104]