ކުޅުދުއްފުށިން މޯލްޑިވް ގޭސް ހުސްވެއްޖެ

ކުޅުދުއްފުށިން “މޯލްޑިވް ގޭސް” ހުސްވެއްޖެ އެވެ.

ކުޅުދުއްފުއްޓަށް މޯލްޑިވް ގޭސް އެތެރެކުރަމުން އަންނަ ސޭމް ގޭހުން ބުނީ އެފަރާތުން ވިއްކަމުންދާ މޯލްޑިވް ގޭސް ހުސްވީ އިއްޔެ ކަމަށެވެ.

މި ނޫހާ ވާހަކަ ދެއްކި ސޭމް ގޭހުގެ އޮފިޝަލަކު ބުނީ ގޭސް ހުސްވީ މާލެއިން ވެސް މޯލްޑިވް ގޭސް ހުސްވުމުން ކަމަށާއި ދެން އެފަރާތަށް ގޭސް ލިބޭވަރު ވާނީ މިމަހު 27 ހިސާބުގައި ކަމަށެވެ.

ކުޅުދުއްފުއްޓަށް “ވިލާ ގޭސް” އެތެރެކުރާ އެތުމާ ކުންފުނިން ބުނީ އެފަރާތުގައި ގޭސް އަދި ހުރި ކަމަށާއި އެހެންނަމަވެސް ހުރީ މަދު އަދަދަކަށް ކަމަށެވެ.

މޯލްޑިވް ގޭހުގެ ތާށިކަމެއް އައިސްގެން މި އުޅެނީ ވިއްސާރަވުމުގެ ސަބަބުން ގޭހުގެ ޝިޕްމަންޓް ރާއްޖެ އައުން ލަސްވާތީ ކަމަށް މޯލްޑިވް ގޭސްގެ ހެޑް އޮފް ސޭލްސް މުހައްމަދު ޝިފާއު ސަން އޮންލައިނަން ވިދާޅުވެފައިވެ އެވެ.

ޝިފާއު ވިދާޅުވީ ކުރިން ހަމަޖެހިފައި އޮތީ އަންނަ އާދީއްތަ ދުވަހު ގޭހުގެ ޝިޕްމަންޓް އަންނަ ގޮތަށް ކަމަށާއި ނަމަވެސް ވިއްސާރައިގެ ސަބަބުން އަންނަ އަންގާރަ ދުވަހަށް ޝިޕްމަންްޓް ގެނައުން ލަސްވެފައިވާ ކަމަށެވެ.

މިދިޔަ އަހަރުގެ ޖޫން މަހުގެ ތެރޭގައި ވެސް މޯލްޑިވް ގޭސް ކުޅުދުއްފުށިން ހުސްވި އެވެ.