އެސްއީޒެޑް ބިލް ފާސްވުމަކީ އަތޮޅުތަކަށް ލިބުނު ކާމިޔާބެއް: ރައީސް އޮފީހުގެ ތަރުޖަމާނު

Aug 28, 2014

ސްޕެޝަލް އިކޮނޮމިކް ޒޯން (އެސްއީޒެޑް) ބިލް ފާސްވުމަކީ އަތޮޅުތަކުގެ ރައްޔިތުންނަށް ލިބުނު ކާމިޔާބެއްކަމަށް ރައީސް އޮފީހުގެ ތަރުޖަމާނު އަބްދުﷲ މުއާޒް ވިދާޅުވެއްޖެ އެވެ.

އަބްދުﷲ މުއާޒު މިހެން ވިދާޅުވެފައިވަނީ އެސްއީޒެޑް ބިލް ރޭ މަޖިލީހުން ފާސްކުރުމާ ގުޅިގެން މީޑިޔާތަކަށް ފޮނުއްވި މެސެޖެއްގައި އެވެ.

މުއާޒު ވިދާޅުވީ މި ބިލް ފާސްވުމުން އެ ހުޅުވިގެން ދިޔައީ އަތޮޅުތަކުގެ ތަރައްގީގެ މައި ދޮރޯށި ކަމަށެވެ.

އެސްއީޒެޑް ބިލް މަޖިލީހުން ފާސްކޮށްފައިވަނީ 60 މެމްބަރުންގެ ވޯޓާއެކު އެވެ. އެ ބިލާ ދެކޮޅަށް 15 މެމްބަރަކު ވޯޓު ދެއްވިއިރު، ބިލަށް ހުށަހެޅި ދުއިސައްތައަށްވުރެ ގިނަ އިސްލާހުގެ ތެރެއިން ފާސްވެފައިވަނީ ހަ އިސްލާހެކެވެ.

މި ބިލުގެ ސަބަބުން ރާއްޖޭގެ އިގްތިސާދީ ހަރަކާތްތެރިކަން އިތުރުވެ ރާއްޖޭގައި ކުރެވޭ އިންވެސްޓްމަންޓުތައް އިތުރުވެ އެއިން ރާއްޖެއަށް ލިބޭ ފައިސާ އިތުރުވެގެންދާނެ ކަމަށް ސަރުކާރުން ކުރިން ވަނީ ބުނެފަ އެވެ.

އިދިކޮޅު އެމްޑީޕީ އާއި ސަރުކާރު ކޯލީޝަނުން ވަކިވި ޖުމުހޫރީ ޕާޓީން މި ބިލަށް ކުރިން ދެކޮޅު ހެދިނަމަވެސް، އިއްޔެގެ ޖަލްސާގައި ޖޭޕީގެ މެމްބަރުން މި ބިލަށް ވަނީ ތާއީދުކޮށްފަ އެވެ.

މިލިޔުމާއި ގުޅޭ