ކުޅުދުއްފުށީ ކައުންސިލުން 14 ގަވާއިދެއް އެކުލަވާލައި އަމަލުކުރަން ފަށައިފި

ލާމަރުކަޒީ ގާނޫނުގެ ދަށުން ކައުންސިލުތަކުން ހަދަން ޖެހޭ ގަވައިދުތަކުގެ ތެރެއިން 14 ގަވައިދެއް ކުޅުދުއްފުށީ ކައުންސިލުން އެކުލަވާލައި މިއަދު އެގަވައިދުތަކަށް އަމަލުކުރަން ފަށައިފި އެވެ.

ކައުންސިލުން އެކުލަވާލައި މިއަދު ސަރުކާރުގެ ގެޒެޓްގައި އާއްމު ކުރި ގަވައިދުތަކަކީ މަގު ކޮނުމާއި މަގުގައި އެއްޗެތި ވަޅުލުމާބެހޭ ގަވާއިދާއި ވަގުތީގޮތުން މަގު ބަންދުކުރުމާބެހޭ ގަވާއިދާއި އާންމުތަންތަނަށާއި މަގުމައްޗަށާއި ފަޅުތެރެއަށް ދޫކޮށްލާފައިވާ ތަކެތި ނެގުމާބެހޭ ގަވާއިދާއި ބަނދަރު ބެލެހެއްޓުމާ ބެހޭ ގަވައިދާއި އާންމު އުނދަގުލާއި ބެހޭ ގަވައިދާއި ގޭގެ ފުރާޅުން މަގުމައްޗަށް އަންނަ ފެން ހިންދުމާއި ބެހޭ ގަވައިދާއި މަގު ފާޜު އަދި އިން ފާރު ތަޅާލުމާ ބެހޭ ގަވައިދެވެ.

އަދި ފިހާރަ ފިހާރައިގެ ކުޑަދޮރުން މުދަލާއި ތަކެތި ނެރެފައި ބެހެއްޓުމާއި ފިހާރައިގެ ދޮރުން ބޭރުގައި މަގުމައްޗަށްވާގޮތަށް މުދަލާއި ތަކެތި ބެހެއްޓުމާބެހޭ ގަވާއިދާއި މަގުމަތީގައި ގާޑިއާ ނުވަތަ މޭޒުބަހައްޓައިގެން ވިޔަފާރި ކުރުމާއި އެކަންކަމަށް ފީ ނެގުމާބެހޭ ގަވާއިދާއި އެއްގަމުގައި ދުއްވާ އިންޖީނުލީ އެއްޗެއްސާއި އިންޖީނުނުލާ އެއްޗެތި ދުއްވުމާއި ބޭނުންކުރުމާބެހޭ ގަވާއިދެވެ.

އަދި މީގެ އިތުރުން މަގުމަގާއި އާންމު ތަންތަނުގައި ޕާކުކުރުމާއި ޕާކުކުރުމުގެ ފީ ނެގުމާބެހޭ ގަވާއިދާއި ތިމާވެށި ހިމާޔަތްކުރުމާ ބެހޭ ގަވައިދާއި ލައުޑް ސްޕީކަރު ބޭނުންކުރުމާއި އަޑުގަދަކޮށް ލަވަޖެހުމާބެހޭ ގަވާއިދާއި ކުނި އުކާލުމާއި ކުނި ނައްތާލުމުގެ ގަވާއިދު އަދި ރަށުގައި ޖަނަވާރު އަދި ދޫނިސޫފާސޫފި ގެންގުޅުމާބެހޭ ގަވާއިދެވެ.

މި ގައިވަދުތަކަށް އަމަލު ނުކުރާ ފަރާތަކާ މެދު 500ރ. އާއި 5000ރ. ދެމެދުގެ އަދަދަކުން ޖުރިމަނާ ކުރެވޭނެ ކަމަށް އެ ގަވާއިދުތަކުގައި ވެއެވެ.

ލާމަރުކަޒީ ގާނޫނުގެ ދަށުން ރަށްރަށުގެ ކައުންސިލްތަކަށް އެ ކައުންސިލުތަކުގެ އިހުތިސާސްގެ ތެރޭގައި ހިމެނޭ ކަންކަމުގައި ގަވާއިދު ހެދުމުގެ ބާރު ކައުންސިލްތަކަށް ދީފައި ވެއެވެ.