ކުޅުދުއްފުށީ ސަރަހައްދީ ބަނދަރު އެމްޕީއެލް ގެ ދަށަށް ބަދަލު ކުރަން ނިންމައިފި

އުތުރުގެ ސަރަހައްދީ ބަނދަރުގެ ގޮތުގައި ބޭނުން ކުރަމުން އަންނަ ކުޅުދުއްފުށީ ބަނދަރު މޯލްޑިވްސް ޕޯޓް ލިމިޓެޑްގެ ދަށަށް ބަދަލު ކުރުމަށް ސަރުކާރުން ނިންމައިފި އެވެ.

ކުޅުދުއްފުށީ ޕޯޓްސް ލިމިޓެޑްއިން ކުރިން ހިންގަމުން އައި މި ބަނދަރު އެމްޕީއެލްގެ ދަށަށް ބަދަލުކުރަން ނިންމާފައިވާކަން ހާމަކޮށްފައިވަނީ މާލޭގެ ހެންވޭރުކޮޅުގައި އަލަށް ހުޅުވި ޓާފް ދަނޑު ހުޅުވުމަށް ބޭއްވި ރަސްމިއްޔާތުގައި ރައީސުލްޖުމްހޫރިއްޔާ އަބްދުﷲ ޔާމިން އެވެ.

ރައީސް ޔާމީން ވިދާޅުވިގޮތުގައި އެމްޕީއެލްގެ ދަށަށް ޕޯޓް ބަދަލު ކުރަން ނިންމެވީ ޒުވަނުންނަށް ވަޒީފާގެ ފުރުސަތު ހޯދައިދިނުމަށެވެ. އެގޮތުން މިއަހަރު ތެރޭ ޒުވާނުންނަށް ވަޒީފާގެ ފުރުސަތުތައް ތަނަވަސް ކުރުމަށްޓަކައި މިއަހަރުތެރޭ މަސައްކަތްތަކެއް ފެށުމަށް ހަމަޖެހިފައިވާ ކަމަށް ރައީސް ވިދާޅުވި އެވެ.

ކުޅުދުއްފުށީ ޕޯޓްގެ އިތުރުން އައްޑޫ ސިޓީ ހިތަދޫ ގެ ޕޯޓްވެސް އެމްޕީއެލްގެ ދަށަށް ބަދަލުކުރަން ވަނީ ހަމަޖައްސާފައެވެ.

ކުޅުދުއްފުށީ ޕޯޓާއި ހިތަދޫ ޕޯޓު މިހާރު ހިންގަމުން އަންނަނީ އެމްޕީއެލްގެ ސަބްސިޑަރީ ދެ ކުންފުންޏަކުންނެވެ.